Durante conferencia di prensa di fraccion di AVP, Parlamentario,drs. Mervin Wyatt-Ras a cuestiona e declaracion di minister di Asuntonan Social. El a trese padilanti cu e lista di espera di Asuntonan Social a bira 2 anja. Con por ta cu cu un lista di espera cu e gobierno aki a encontra di 2 luna por a bira 2 anja den apenas un anja di gobernacion?
Envez di anuncia cu ta dominando e crisis y e lista di espera aki cu e minister mes a crea pa e por hustifica cu tin crisis, e ta anuncia un logo di crisis social.
Kiermeen a yora anjanan largo cu tin mega debe, despues pa hustifica cu tin mega debe a crea un “crisis” y awor envez di bin cu plan concreto pa ataca e “crisis” y pa yuda nos hendenan cu e ta bisa ta den “crisis” y anuncia pues cuanto di e hendenan a sali for di situacion di e zogenaamde crisis, e ta bin cu fanfaria pa presenta un logo cu a ser trata pa e crisis. Kiermeen e “crisis” aki lo ser propaganda pa medio di e logo aki. Kiermeen ta keha cu tin mega debe, crisis financiero, pero tin placa pa paga un compania pa traha un logo y print tur articulo cu logo riba dje. Ta anuncia cu lo bin un campanja di prevencion. Esaki no ta nada nobo sino ta algo cu gobierno anterior tabata haci den cual diferente instancianan y fundacionnan tabata encarga cu e tarea aki a base di nan subsidio.
Gobierno ta menciona cu UNICEF lo bin Aruba pa duna sosten. UNICEF den pasado caba a yega di duna sosten na Aruba pa investiga y traha e plan integral di hubentud y implementa esaki. UNICEF lo no bin Aruba y haci comosifuera nada no a existi promer sino lo tin cu ehecuta e plan cu gobierno antrior ya caba a cuminsa traha na dje. E entidad di exterior ya caba tin un relacion cu Aruba.
Wyatt-Ras ta lamenta cu minister ni kier contesta Wyatt-Ras su preguntanan cu ela haci encuanto di e fondo pa administra e placa, esta e “begrotingsfonds” cu lo apunta pa atende cu sector social. Ki dia e ley di fondo di crisisplan lo drenta parlamento pa ser trata? Minister a manda un carta Parlamento tocante e fondo.
Parlamento no a proba nada sino a duna su “gevoelens” pa loke ta den e carta, esey por sosode den un reunion di Comision Central. Cada biaha e minister ta bisa cu Parlamento a aproba e fondo locual no ta berdad, e ley pa reglamenta dicho fondo no a ni drenta Parlamento corda pa e wordo trata den reunion publico.
Den e raport di e CAft tambe a trece padilanti e suma di crisisplan no ta den presupuesto 2019 y cu e mester wordo agrega. Sinembargo ni foe ni fa di e ley pa reglamenta e fondo. E ley aki lo haci posibel cu parlamento por controla mihor kico ta pasa cu e placa pa sector social dor di cual no por djies nombra hende den tur departamento bao di capa di crisisplan. Pero ta parse cu e gobierno aki cu a priminti transparencia den gobernacion awor a resulta cu no ta compronde kico ta transparenca corda pa traha den forma transparente.
Wyatt-Ras cu mes tambe a traha na Asuntonan Social ta trese padilanti cu esnan cu ta traha den sector social ta traha duro y ora no tin medio ta uza di nan mes pa yuda e cliente. Pesey mes minister envez di haci propaganda mester otorga actornan den sector social e medionan cu el a priminti nan pa nan por traha. E hecho cu te hasta no tin cierto servicionan na San Nicolaas, no por ta posible. Pueblo di San Nicolaas no por keda sin servicio, en especial dor di subidad di tur prijsnan dor di cual un cantidad di persona no tin placa pa paga bus mester garantisa servicio na San Nicolaas. Ademas si ta anuncia cu tin “crisis” anto clientenan mester por bai libremente na diferente centralnan pa busca yudansa. Pues loke ta ser papia y loke ta ser bisa di “crisis” no ta cuadra cu loke ta ser haci pa soluciona simple problemanan social.
Ademas tambe mester traha e MFA na San Nicolaas segun e parlamentario pa asina habitantenan di e bario aki tambe por tin un espacio multifunctional pa nan por paga nan belasting, awa, coriente y regla otro asuntonan den un espacion agradable unda nan por topa mas hende. Si otro barionan por a haya esaki pakico San Nicolaas no. Esaki ta loke Wyatt-Ras a trece padilanti.
