MEP y RAIZ a aproba nombracion di e ministernan nobo sin pidi ningun informacion y sin tene cuenta cu un conflicto di interes miyonario. Na mei 2021 a sali den prensa cu Endy Croes a demanda Ernst & Young y Fundacion Lotto pa Deporte. Segun prensa Endy Croes su interes den e caso aki ta un suma di por lo menos 3 miyon Florin. E hecho cu Endy Croes ta contra partido di Fundacion Lotto pa Deporte den e demanda aki ta haci cu Endy Croes tin un interes personal miyonario cu ta conflictivo cu e interes di Fundacion Lotto pa Deporte.
Pa e motibo ey parlamentario pa fraccion di AVP, mr. dr. Ryçond Santos do Nascimento a entrega preguntanan na Prome Minister, Evelyn Wever-Croes y Minister di Integridad, Ursell Arends, relaciona cu e cuestion aki. E preguntanan ta revela cu Gabinete Wever-Croes II ta midi Vanessa Tjon-Kock cu otro midi cu Endy Croes: un mester bandona su funcion pa motibo di un posibel conflicto di interes y e otro ta haya un Jackpot den forma di e cartera di deporte. Ademas, e caso aki ta revela cu Gabinete Wever-Croes II ta sigui usa e topico di ‘integridad’ como slogan politico, sin bin cu cambionan structural den e organisacion di gobierno. Aki parlamento tambe a faya, pa motibo cu ni fraccion di MEP ni fraccion di RAIZ kier a tuma nan responsabilidad y controla e candidatonan pa minister prome cu duna nan aprobacion.
Ryçond Santos do Nascimento a haci uso di e oportunidad tambe pa duna contesta na e comunicado di prensa di MEP cu a sali entre otro den DIARIO di 21 di september y cu ta dirigi na su persona. Den e comunicado MEP ta sigui ripiti e engaño di ex-minister Bikker cu segun Constitucion e vertrouwensregel ta encera cu ora cu un fraccion no tin confiansa mas den ‘su’ minister e minister ey no por keda como minister mas. E teoria aki ta sumamente peligroso pasobra e ta vocifera e idea di un democracia partidario (partijdemocratie) siendo cu nos Constitucion ta conoce un democracia parlamentario (parlementaire democratie). E vertrouwensregel ta ancra den articulo II.2 inciso 2 di e Staatsregeling di Aruba: “Indien een minister het vertrouwen van de Staten niet langer heeft, stelt hij zijn ambt ter beschikking.” Cu otro palabra: solamente Parlamento tin e autoridad pa papia na nomber di Pueblo. Naturalmente, siempre en cuando tin quorum.
Parlamentario Ryçond Santos do Nascimento a finalisa cu un yamado na e partidonan di coalicion pa para pa integridad y exigi pa kita e cartera di deporte for di Endy Croes y mustra un tiki mas madurez politico y seriedad den nan trabao.
22 september 2021
