Tin un dicho popular cu a bisa cu ora cabaron bisa’bo cu e lodo ta hole stinki, ker’e, ya cu e ta biba eyden y e sa kico ta pasa y ta mesun cos ta pasando cu e miembro di fraccion di MEP, Edson Croes, kende tin algun dia ta dedica su mes na trata di susha diferente hende nan nomber keriendo cu esaki ta su tarea como miembro di Parlamento.
E e dicho aki a haya mas contenido sigur ora cu scucha Endy Croes referi na ex Minister Benny Sevinger como ‘djaca den trampa’ pero esaki ta un observacion cu sin duda e parlamentario di fraccion di MEP tin hopi experencia aden, ya cu el a yega di biba manera djaca den trampa, sigur ora cu compania di electricidad a descubri cu e tabata comete fraude cu meter di coriente.
Mester accentua ariba e parti di e djaca den trampa ta ora cu a estafa Elmar NV dor di para meter no solamente pa famia pero famia tabata envolvi den varios otro negoshi cu a percura pa para meternan y cobrando hopi suma pa e trabaonan dor di estafa ELMAR NV
Mesun caso a ripiti ora esunnan encarga cu botica a bay over na estafa AZV dor di manipula cu facturanan dor di cobra mas cu locual cu mester a cobra y awor kier tilda hende pa djaca den trampa.
E storia tras di e scandal di fundacion di Lotto pa Deporte caminda cu e storia ta conoci con tabata maneha contractonan pa famia esta ruman y di cual Endy Croes mes a reconoce den su contestanan na Ernest & Young cu kier of no kier, e tambe tabata forma parti di e fiesta cu placa di lotto pa deporte dor cu e tambe a bin na derecho di e 20 % como yiu y ruman di e propietario di e 8 negoshi nan cu a core registra, pues esaki nos ta yama strica mientras cu e djaca tabata fiesta
Berdad lo sigui colga bo persona pe e forma cu awe bo kier sconde pero bo contestanan y aceptacion di bo maniobranan lo sigui persigui bo paso e evidencia principal ta bo declaracionnan haci riba locual cu a wordo constata pa loke cu tabata bo maneho.
Acaso cu esaki ta bo experiencia ariba con pa strica placa di pueblo???
No lansa gritonan di acusacion den direccion di otronan pa locual cu abo ta asumi paso e dicho ta bisa lo siguiente: “Piensa el ladron que todo son de su mismo condición”
Awor a core manda directiva di e fundacion cas sin motibo valido y sin argumento legal y Corte a para e decision aki den forma corecto, evitando cu e wega di ‘friends & family’ bolbe cuminsa cu placa pa deporte.
Den otro dicho cu nos conoce masha bon na papiamento, ta bisa cu ‘miho keda keto y aparente un bobo, cu habri boca y mustra tur hende cu bo ta bobe’ y esaki ta aplicabel atrobe pa e Parlamentario di MEP aki.
Den su insistencia pa haya cosnan pa famia y amigonan, Endy Croes a presenta e briyante idea di converti gobierno di Aruba, den bendedo di gasolin, insinuando cu ta bon pa FMSA cu ta resorta aworaki bou di maneho di Refineria di Aruba, cu ta un compania estatal, bay cay directamente bou di responsabilidad di gobierno, supuestamente pa controla prijs di gasolin.
Ta increibel y sigur ora cu esaki ta bin for di un persona cu ya caba a cometa actonan pa cual el a wordo investiga y persigui, bin c’un locura asina ya cu realmente loke MEP kier haci cu e tipo di ideanan aki, ta pa e compania di FMSA cay den man di famia y amigonan, di sponsornan di campaña y caminda pueblo un biaha mas lo wordo perhudica.
Ta un berdadero djaca cu a biba den trampa caba, a sinta pensa riba e tipo di maniobranan aki pa asina sigui beneficia un solo grupo den comunidad, cu ta amigonan y famia di MEP, ya cu no tin otro hustificacion pa e briyante y macabro idea aki cu a cende den cabes di e parlamentario di MEP aki.
Ora cu scucha parlamentarionan asina insisti pa na luga di atende cu nan responsabilidad pa bin cu leynan pa yuda pueblo, e ta duna nos e impresion cu gabinete Wever Croes ta gobernando for di Noordpool, hungando pa Santa Claus pa ‘friends & family,’ buscando pa complace cu peticionnan di sponsornan, mientras cu e unico regalo cu pueblo lo ricibi for di e gobierno aki, ta un pakete di medida cu lo hinca hopi famia den preta y problemanan serio,” Melvin Tromp di AVP ta declara.
