Den un esfuerso mutuo pa fortifica servicio medico na Aruba y mehora e calidad di cuido pa pashentnan, miembronan di fraccion di AVP, mr. M.G. Eman y drs. M.G. Wyatt-Ras, a haci entrega oficial di preguntanan parlamentario. E preguntanan aki ta concerni e deseo di Eman y Wyatt-Ras pa Aruba mes por yega na tin un PETSCAN. Esaki lo percura entre otro pa no ta necesario mas pa manda pashentnan pa e tipo di examennan medico aki bay den exterior. 

Compra di un PETSCAN pa un Dr. Horacio Oduber Hospital renoba no tin solamente un bentaha potencial pa laga pashentnan keda den nan ambiente familiar y di amistad, pero ta brinda tambe perspectiva pa servicio medico mas amplio na islanan bisiña manera Corsou, Bonaire, St. Maarten, Saba y St. Eustatius. Ta asina cu un PETSCAN ta mas deseabel den cierto caso cu un CT-scan. E calidad di examen medico lo mehora enormemente cu nos propio PETSCAN.  

Den un declaracion conhunto mr. M.G. Eman y drs. M.G. Wyatt-Ras ta declara lo siguiente:

“En bista di un mehoracion di servicionan medico firmantenan ta desea di haya un conocimento di e factibilidad di un PETSCAN pa Aruba. Den cuadro di esaki ta sigui un serie di pregunta pa loke ta e actual practica di manda pashentnan den exterior pa un procedura di PETSCAN. E preguntanan aki no ta enfoca solamente riba e factibilidad financiero pa un posibel compra di un PETSCAN y e servicio regional, pero tambe e bienestar di pashentnan mes y e importancia di examennan asina den un ambiente di famia y amistad. 

E preguntanan cu Eman y Wyatt Ras ta haci na e Minister encarga cu Salud Publico ta encera temanan manera cuanto pashent a base anual ta wordo manda pa exterior pa haci un PETSCAN, e gastonan cu esaki ta trece cu ne, e periodo di estadia den exterior, e necesidad di un acompañante y gastonan envolvi cu esaki, experiencia cu aparatonan den exterior y calculacion di e gastonan pa compra di un PETSCAN pa Aruba.  

Miembronan di fraccion di AVP Eman y Wyatt-Ras ta pidi Minister pa den un forma critico huzga e practica actual y pa evalua seriamente e compra di un PETSCAN. E paso aki lo tin un impacto positivo pa Aruba y lo fortifica rambe e posicion di competencia di Aruba como proveador di servicio medico den nos region.