Cas Real semper ta demonstra hopi carinjo pa Aruba y interes den con cosnan ta bayendo pa nos Pueblo y País. Pesey e contacto cu Cas Real tur ora ta yen di aprecio y afeccion pa Aruba. Esey no tabata otro awe na momento cu Eman y su delegación a hiba un bishita personal cerca un amiga grandi di Aruba, Prinses Laurentien.   

Líder di fracción di AVP, mr. Mike Eman, su esposa Doina y consehero Wendrick Cicilia den cuadra di nan misión na Hulanda a haci bishita serca Prinses Laurentien. 

Eman y Prinses Laurentien a intercambia di idea riba e proposición pa yega na realisa un Sociaal Cultureel Planbureau pa Aruba. Prinses Laurentien tin hopi iniciativa den cual su enfoke ta pa yega na scucha kico ta e dolornan den comunidad. Den e cuadra ey e concepto di un instituto cu ta haci gobernantenan, parlamentarionan mas informa y conciente kico ta e dolornan, nececidadnan y aspiracionnan den comunidad ta synchronisa cu temanan cu Prinses Laurentien ta dunando hopi atención. 

E hospitalidad di Prinses Laurentien un vez mas tabata hopi caluroso y atento pa cu e bishita di Mike Eman y Doina cu e conoce hopi anja. Na final di e encuentro caluroso aki Eman a expresa cu nos ta contento cu den Reino nos tin un famia Real cu un curason grandi pa Aruba. Y awe nos por a toca un punto común: “mensen moeten gezien, gekend en gehoord worden”.  Esey ta un sentimiento y mision cu nos ta comparti cu Prinses Laurentien, mr. Mike Eman a finalisa expresando cu gratitud pa e hospitalidad real.