Lider di CDA y lider di fraccion den Tweede kamer pa su partido Sybrand van Haersma Buma ta un otro politico prominente cu a ricibi lider di AVP den su oficina pa papia riba varios tema di interes. AVP ta partido ruman di CDA y nan relacion ta data di hopi aña atras. Eman y Yrausquin kende a compañe a wordo ricibi cu tur cortesia.
Van Haersma Buma a bisa cu e tabatin un combersacion masha ameno cu ex Prome Minister Eman y tambe ex Minister Plenipotenciario Juan David Yrausquin. “Esaki tabata un bon re-encuentro y na mes momento ta bon pa mira tambe con envolvi Eman ta cu Aruba, pero tambe cu Reino. Loke pa mi ta importante tambe ta su envolvimento cu Europa”. Pa loke ta e ambicion di Eman pa drenta Union Europeo como Parlamentario lider di CDA a bisa cu el a haya cu Eman tabata masha habri mes riba e tema aki. “E ta mira e oportunidadnan pa Aruba, pero tambe pa Hulanda si Aruba ta un poco mas cerca di Europa. Di su banda pa Europa ta importante pa tin bon bisiña den e region Caribense. Ambos por bira mas fuerte door di e contribucion cu Eman por duna.”
Van Haersma Buma a bisa cu si bo ta activo den Parlamento Europeo, bo ta sinta eyden pa tur Hulandes, tanto di Caribe como di Europa. Esaki ta algo interesante y Mike Eman ta wak esaki for di e bon perspectiva tambe. Na mes momento mi ta pensa cu ta hopi balioso cu si hendenan di Aruba, pero tambe di otro partinan di Reino sinti nan mes mas envolvi. Corda bon tambe cu Mike Eman no lo yega Europa como un nobato den politica. E ta un politico cu tin su contactonan riba nivel di lidernan mundial. E ta un persona cu ta drenta como colega cu e conocimento con politica internacional ta funciona. Mi ta sigur cu tanto pa e parti Caribense di Reino como e parti Europeo lo ta algo sublime si por tin un representante di Aruba den UE.”
Lider di CDA a recorda con den pasado Mito Croes tambe tabata un candidato di CDA pa drenta Parlamento Europeo. “Tabata falta masha poco voto pa e por a drenta, pesey mes e ta kere cu Eman tin tur motibo y e conocimento pa tuma un paso asina si e lo desea esey.”
Na final Van Haersma Buma a bisa cu e problemanan cu Venezuela tin atencion di Hulanda y CDA ta masha preocupa cu loke ta pasando. Un isla manera Aruba mester por haci negoshi liber cu Venezuela. “Nos ta wak cu hopi preocupacion con e situacion ta bayendo y e problemanan cu tin na Venezuela. Nos a bisa nos gobierno pa hunto cu Aruba, Corsou y Boneiro trata na soluciona e friccionnan cu tin. E comercio, sigur pa loke ta cuminda fresco mester sigui.”
Cu un fuerte abrazo a despedi di otro cu e promesa di topa pronto un bes mas.
