Partido AVP a tuma e iniciativa di tene nan evento di Brainstorming Session, pasobra ta mira cu e isla y poblacion ta asota pa un di dos ola di Covid-19. E tin un impacto na cada skina di e pais y no tin un hogar na Aruba cu di un forma of otro no ta afecta pa Covid-19.

Tin bintidos pashent den hospital di cual dos ta den ICU. Mike Eman, lider di AVP, a remarca cu ora di tuma e cifra internacional cu ta bisa entre 10% y 20% di e total positivo por yega te na hospital, AVP ta sinti cu nan tin un responsabilidad pa hunto cu tur esnan cu ta maneha e crisis pa mira unda y con cosnan a cana pa por a yega mil caso. Pa mira unda por contribui y bin cu mehoracionnan pa haci miho. A scucha tur specialista, esnan cu ta den cuido medico y esnan cu ta asesora e procesonan. Ta sinti cu tin un consenso cu e di dols ola Covid-19 a resulta hopi mas grandi di loke a spera.

Tabata di spera cu ora di habri frontera, lo bay haya casonan nobo di Covid-19. Segun Eman, e cantidad cu a bin bek a sorprende hende. Nan ta sinti cu den comunidad tabata tin atencion ora esaki a yega prome biaha pa loke autoridad tabata bisa, e normanan estableci, consehonan duna tabata tuma nan na serio. Lider di AVP ta preocupa hopi y p’esey a organisa e encuentro aki, pasobra ta sinti cu falta comunicacion entre tur comunicacion di oficialnan y comunidad.

Comunidad ta skeptico y por mira e comentarionan riba media social, tur conseho duna no ta tuma nan na curason manera algun luna atras. “Ta importante pa puntra bo mes di con esey ta y con pa remerdie,” el a bisa. Parti di esaki tin di haber cu ora hende a spanta tanto di asina hopi caso, hende ta bay pensa mas critico kico no ta bay bon. Tambe Gobierno mester ta autocritico na momento cu a cera frontera y na cierto momento a logra baha Covid-19 casi cero. A cuminsa un campaña cu tabata poco profesional, pasobra tabata zona hopi politico, Eman a bisa.