Recientemente a tuma nota di un conferencia di cannabis na Aruba. Loke a sorprende cu berdad, manera Gobierno a indica, cu e suma tabata presupuesta. Pero e pregunta ta, kico ta e necesidad real pa tin un conferencia asina aki? Segun Parlamentario di fraccion di AVP, Robert Candelaria, mirando cu esaki ta cay bao di Ministerio di Enseñansa lo asumi cu e tin un aspecto informativo y tambe educacional den dje. 

Pero si e intencion ta pa educa hobennan den comunidad over di cannabis, papiando di e parti recreacional, esta di humamento di marihuana, anto e educacion ey lo ta hopi breve. Mester siñanan pa no cuminsa mes, no hum’e, pasobra e consecuencianan ta grave.

Mester corda cu e cannabis di antes, e nivel di e substancia den dje, cu ta haci un hende bay bao di influencia, tabata menos di loke e ta awendia. Despues di manipula cu substancianan den e mata, a haci cu awendia e efecto ta mucho mas grandi. Pesey, si bo kier educa un persona riba con pa deal cu e droga aki, e educacion ey lo ta hopi cortico. No mishi cun’e, no uz’e y cu e consecuencianan p’abo no ta bon.

Pakico ta enfatisa esaki? Pasobra hecho ta cu mayoria hende cu a bira adicto na droga y harddrugs despues, a cuminsa humando marihuana. Pesey awor aki, no por compronde kico ta e aspecto asina importante y e link di enseñansa cu Ministerio di Enseñansa a paga 100 mil florin pa un conferencia asina aki.

E solo hecho cu e enfoke di e conferencia tabata riba cannabis medicinal y no recreacional, ta haci cu tampoco Parlamentario Candelaria ta compronde cu e mester a cay bao di Ministerio di Enseñansa. Minister Rudy Lampe a bisa den Parlamento cu e kier pa e presupuesto di Enseñansa ta mas grandi, pa tin hopi mas placa. E ora ey kico ta e motibo dicon ta uza e fondonan limita pa paga pa un conferencia asina? Si e aspecto tabata pa informa riba e parti medicinal, e ora Ministerio di Salubridad Publico (Dangui Oduber) mester a paga esaki y e consecuencianan cu adiccion na droga ta trece cune, logicamente lo mester a cay bao di un otro ministerio y sigur no enseñansa.

Recapitulando, Parlamentario Robert Candelaria a comenta cu un conferencia asina, paga door di Ministerio di Finansas of Ministerio di Enseñansa, no ta na su luga. Pasobra e informacion duna, si e tabata pa e parti recreacional, e marihuana cu ta huma, loke kier educa cualkier ser humano, sea ta hoben of adulto caba, ta un droga, e ta peligroso, e tin consecuencia malo p’abo, no uz’e, no mishi cun’e. Si e idea su tras tabata cu e ta pa algo medicinal, e ora ey informacion lo ta mas na su luga, pero tampoco no di Minister di Enseñansa.

Den temponan aki, Gobierno ta papiando di un crisis financiero, cu mester uza e fondonan limita, mas miho. E manera cu a haci esaki un prioridad y a uza e placa aki pa e proposito di e conferencia aki, no ta na su luga. Robert Candelaria ta haya cu Gobierno den futuro mester haci su huiswerk mas miho, pasobra gran mayoria di pueblo ta contra marihuana recreacional y hopi hende lo kier mas informacion prome cu tuma un decision riba e substancia aki medicinal. Pero pa hinca esaki den Ministerio di Enseñansa, nos tur sa for di cua partido e ta bin y nos tur sa kico tin su tras. Esaki no ta na su luga! 

Ta spera cu lo coregi e tipo di erornan aki y no ripiti mas den futuro, asina Parlamentario Robert Candelaria a termina bisando.

######