Ora bo ta na suela of perdi, bo mester busca forma pa lanta y traha mas duru pa gana. No sigui na suela y sigui perde. E les aki hopi di nos a haya den nos hubentud na cas, na scol of riba veld di deporte. Never give up!

E situacion den nos pais awor aki parse cu nos a perde, ta perdiendo y no ta haci mucho pa stop di perde. E cortamento den salubridad y enseñansa ta un ehempel di haci cosnan cu ta pone nos sigui perde! Pasobra si cuido di salud di pueblo bay atras, e ta afecta nos productividad pa sali dilanti. Y ta bon conoci cu si corta den cualkier parti di enseñansa, sea ta den material, mantención y limpiesa, den facilidadnan fisico, den training di maestronan y den salario di maestronan, e lo tin efecto hopi negativo riba enseñansa di nos alumnonan.

Loke tambe nos sa di experiencia rond di mundo, ta cu enseñansa ta sin niun duda e miho instrumento cu ta existi pa soluciona problemanan di paisnan den forma structural y bira un pais solido y resistente! Circunstancianan den mundo por ta hopi dificil, pero lanta bek di e sla cu nos a haya y traha mas duru, por sosode solamente si actua y tuma desicionnan pa nos tur por bira mas fuerte atrobe.

E IMPORTANCIA DI ENSEÑANSA

Hopi di nos generacion cu a logra bay scol basico, scol secundario y sigui studia na Aruba of den exterior, lo bisa cu ta danki na nan enseñansa cu nan a logra un carera, un entrada y un calidad di bida miho cu nan majornan. Hasta esnan cu a lanta den un famia rico por bisabo cu e rikesa di e famia a yuda nan start den bida, pero sin nan propio esfuerso y estudio, nan lo no ta unda nan ta.

Pa nos tur enseñansa ta determinante unda nos kier yega. Ami mes a lanta den un famia cu hopi atencion, amor y abundancia. Esey sigur a yuda mi ta un “A student” na skol. Mi rapportnan di scol basico tabata jena di 9 cu 10. Despues di scol basico y VWO na Colegio Arubano mi a sigui mi studio na Hulanda y a cab’e. Awe mi tin un bon profesion y un bon calidad di bida, danki na mi majornan pero tambe danki na mi enseñansa.

Lamentablemente no ta tur esanan cu mi a lanta cune di infancia y hubentud tabata tin e mes un caminda ey den bida. Na scol basico y den secundario mucho hopi tabata score malo y no a caba nan estudio. Awe mi sa cu hopi di esnan cu no a caba scol, no ta pa falta di capacidad of talento. Mi ta compronde tambe cu e situacion den mucho cas di famia no tabata (y ainda no ta) duna pa cada mucha haya e sosten material of e guia pa studia, manera ami a haya. Awe mi ta compronde tambe cu nos sistema di enseñansa tin fayonan cu mester wordo drech’a. Pesey, pasobra enseñansa ta asina importante, nos comunidad tin e obligacion pa trece cambio caminda obviamente e necesidad tey. Pasobra ora un mucha faya na scol, nos comunidad y Aruba ta perde di gana! –

Gregory Bronswinkel Ta continua cu parti 2 pronto