No tin ciego mas ciego cu esun cu no kier mira ta un dicho masha popular pa señala hendenan cu ta insisti pa no mira y acepta berdad di cosnan y vocero di AVP, Melvin Tromp ta kere y ta sigur cu Parlamentario di MEP, Edgard Vrolijk ta un politico terce y ciego pa mira e realidad.
MelvinTromp ta mustra cu ora cu scucha un politico hoben asina, kende den casi tur reunion publico cu el a hiba disertacion a insisti cu su politica ta un politica nobo, pero en realidad Edgar Vrolijk no kier bira cu e realidad politico di su partido.
“Na momento cu haya un politico cu no ta interesa pa pone su mes na altura di cierto berdadnan den enseñansa, pa colmo su ramo di trabou, ta surgi un tipo asina terce y tapa manera Edgar Vrolijk, kende ta insisti pa bisa pueblo un berdad cu e mes no kier mira of acepta.
Ora cu scucha e tipo aki declara cu durante 8 aña Mike Eman y su gabinete, no a ni interesa pa por tin educacion di calidad na Aruba, e ta bolbe confirma su incapacidad politico cu el a bin ta insisti ariba.
Dos aña na mando ainda su gobierno no por mustra algo cu nan a haci pa enseñansa cu no ta di crea conflicto y problema continuo cu maestronan pa su Minister Rudy Lampe.
Na luga cu Vrolijk lanta para y atende cu su minister riba e desaroyonan negativo cu e ta ocasionando, e ta prefera di bay atende cu maneho di un gobierno di AVP, cu a inverti tanto den educacion di nos pais.
Tin otro dicho cu ta bisa cu ‘ta miho keda keto y mustra bobo, cu habri boca pa tur hende haya sa cu en realidad bo ta bobo,’ loke mi ta kere ta aplicabel pa Parlamentario Vrolijk aki.
Si el a pone su mes na altura di tur loke gobierno di AVP a haci den ocho aña pa educacion na Aruba, e lo a haya sa cu 80 miyon florin Gabinete Mike Eman I y II a inverti den enseñansa pa drecha e desaster cu su partido MEP a laga atras na 2009.
Es mas, Edgar Vrolijk tabata maestro di scol na Cacique Macuarima prome cu el a drenta Parlamento cu ta un scol cu bou di gobierno di AVP a conoce un renobacion grandi, caminda a cambia bentana- y portanan, drecha baño y construi e cura di scol y a pone airco pa e scol como prome fase di e proyecto di renobacion.
E di dos etapa di e renobacion mester a wordo ehecuta bou di e actual gobierno di MEP, gobierno di Edgar Vrolijk pero caminda simplemente esaki no a tuma luga y na luga di hunga pa bobo como politico, ta bon bo persona puntra e gabinete di bo lider, di con esaki no ta tumando luga.
Ta bon pa Edgar laga e maniobranan di shishi aki un banda y haci su trabou como parlamentario puntra su gobierno ta kico nan a haci cu 100 miyon florin cu nan a gasta adicional manera CFT ta bisa pero ningun debchi a bay pa educacion.
Ora cu bo no kier mira bo no ta mira pero pa haci politica barata Edgar Vrolijk ta e payaso di mas grandi cu por tin ya cu si e busca informacion adecuado, e lo haya sa cu Zigi College ta un MAVO school na Noord cu despues tin cu wordo transforma den un HAVO, loke no por a tuma luga den tempo di AVP, pa motibo cu no tabatin suficiente maestro pa duna lesnan necesario riba e nivel aki.
Edgar ta papia di proyecto di tram, si en berdad bo gobierno ta haya esaki no tabata necesario, bay over na bende e tram,, para e proyecto, manda e trahadonan cas, mata centro di Oranjstad cu bo gobierno a priminti di lo yuda, ainda mas.
Loke Edgar tin cu stop di haci ta di permiti cu e ta wordo usa den weganan politico cu e mes no ta compronde, na luga di bay controla kico Minister Lampe ta haciendo y por cambia e situacion cu tin awor crea pa e minister aki,” vocer di partido AVP, Melvin Tromp a declara.
