Lider di fraccion di AVP den Parlamento, sr Marlon Sneek a mustra cu masha atencion y preocupacion, nan a tuma nota ci e “Economic Outlook October 2018’ di Banco Central, cu den cierto sentido ta confirma lamentablemente, locual AVP a bin ta bisando for di publicacion di e Business Perception Survey cu a tuma luga riba e prome y di dos kwartaal.
Sr Sneek a mustra cu esaki a mustra cu e pais ta den un recesion, ya cu e survey a mustra con cla cu bentanan ta bayendo atras, den cual a mustra cu comerciantenan a indica, cu inversionnan no ta bay tuma luga pasobra comerciantenan no tin confiansa den economia.
“Tempo cu fraccion di AVP a trece e informacion delicado y serio aki di e survey di Bacno Central, cu esaki no ta berdad, cu e Survey Perception lo a uza tabel cu no tabata di Banco Central y ningun momento a bay riba e tema serio mes.
E tabelnan cu a wordo uza algun ta di Banco Central y algun cu nos mes a traha cu cifranan oficial di Banco Central y no ta nos cifranan cu nos a saca for di shelo pero cifranan oficial di Banco Central.
Awe cu nos a haya e Economic Outlook pa October 2018, locual cu AVP a bisa y pronostica, a bira realidad y esaki ta di lamenta ya cu na momento cu nos a bisa e fraccion cu ta sostene gobierno pa yama e minister aden pa nos debati riba e cifranan, nan a nenga pa haci esaki.
Un biaha mas por a mira un set di marioneta den parlamento cu no ta haci nan trabou, cu ta pretende di ta esunnan cu ta bay controla gobierno, pretende cu nan ta e generacion nobo, cu ta bay tin un otro tipo di politica, pero awe tur hende por mira cu ta simplemente un set di ‘ja knikkers’ ta sinta den parlamento caminda nan a wordo dirigi for di L.G. Smith Blvd 76 riba kico nan tin cu haci of laga di haci.
Sigur pa nos di AVP ta importante pa analisa locual e Business Perception Survey aki a duna nos di conoce, cu ta bisa bon cla cu e GDP pa 2018 lo conoce un reduccion te cu 0.5% na luga di e aumento anticipa di 0.3%.
Ora cu analisa e tabel cu Banco Central a presenta, nos por conclui cu Aruba ta den un recesion y nos por mira c’un gobierno cu a haya un pais na 2017 c’un crecemento economico di 2.3% awe ta den un -0.5% pues den cifranan negativo, manera cu a pasa na 2009 ora cu a tuma gobierno over for di MEP.
Ta mescos cu nos compara e situacion aki caminda gobierno actual a haya un auto cu ta core casi un aña pasa y awe e mesun auto aki ta riba bloki, un gobienro cu a haya un economia cu tabata draai, a haya un pais cu ta produci, a bin cu medidanan y no por lubida e medidanan aki, ya cu esey ta locual a causa loke nos tin awe.
Banco Central a bisa esey tambe ora cu den e rapport nos lesa di entre otro reduccion di poder di compra, dor di medida, mencionando cu e e medidanan aki lo influencia y reduci consumo y tambe a mustra cu introduccion na luna di juli ultimo di aumento di BBO y BAZV, for di 3.5% pa uno combina di 6%, lo percura pa reduci e poder di compra di consumidonan pa un nivel considerabel tanto den 2018 como 2019.
Pues e efecto negativo aki di e medidanan di gabinete Wever Croes, no solamente lo tin su impacto negativo den 2018 pero tambe den 2019 y por mira esaki den e tabel cu Banco Central a presenta.
E tabel aki ta mustra cu locual nan a pronostica pa 2018 cu tabata un crecemento di 0.3% , awe a wordo cambia pa Banco Central y nan a pone esaki na -0.5% y na mes momento ta duna un pronostico pa 2019 di 0.1% y nos por a mira caba ki efecto esaki di biaha den nos paisnan bisiña ora cu nan tabata core den 0.1% y 0.3% awe nos por mira e debacle y problemanan cu nan tin cu ta danki na mesun medicina aki cu a wordo implementa e tempo ey hisando e BO cu nan conoce y aki na Aruba a aumenta e BBO cu mesun consecuencia negativo aki,” Parlamentario Marlon Sneek a mustra.
