Marlandi Gracia tabata un orador invita pa forma parti di e prome simposio ariba e tema di “E BON COMUN”. Marlandi Gracia ta un profesional activo den e mundo di Business Management cu pensamentonan innovativo y transformador tocante con ta duna contenido na e E BON COMUN den un contexto economico. 

Ademas di a sigui un formacion den Business Management, Marlandi Gracia a optene un formacion den liderazgo for di Hillsong College. Marlandi Gracia e capta e atencion y curason di tur presente den e Aula di EPI cu su presencia contagioso y su discurso orginal y interesante.

Marlandi Gracia e inicia su discurso subrayando cu e participacion di un empresa den nos comunidad ta hopi mas amplio cu solamente genera ganashi pa su mes. Cada empresa cu ta forma parti di nos economia, tin un responsabilidad cu nos comunidad, esaki a keda conclui como e “Corporate Social Responsability”. E BON COMUN ta reta cada compania pa crea un balance entre genera ganashi, envolvimento social y ecologia. E bon comun ta contribui na un economia unda empresanan ta enfoca riba crea prosperidad, cu respect pa e aspecto social y humano di nos comunidad, manteniendo nan mes den e cuadro ecologico respectando asina nos naturalesa. E fruta di esaki lo ta un economia cu ta produci calidad di bida pa tur hende cu forma parti di nos comunidad, y asina reduci e desigualdad creciente den nos comunidad.

Marlandi Gracia for di su propio experencia manehando un responsabilidad grandi den un empresa exitoso aki na Aruba, e enfatisa cu “ BON POR RICIBI LOCUAL CU BO NO TA DUNA PROME” refierendo na e trato y condicionan laboral di empleadonan cu empresanan mester percura pe. E BON COMUN ta influencia un cambio di e cultura empresarial. Marlandi Gracia a indica cu e empleadonan ta e cliente interno. E empleadonan mester avansa hunto cu e empresa. Sino esaki ta bay crea un desbalance den nos comunidad y un desmotivacion den e empleadonan. Pa realisa e ideal aki e ta rekeri inversion continuo den e bienstar emotional, intelectual y financiero di e empleado. Esaki ta un perspectiva economico nobo cu a nace for di inspiracion di e deseo pa sirbi “ E BON COMUN”. Marlandi Gracia a indica cu e empleadonan ta e aspecto mas valioso di un empresa y mester wordo trata como tal.

Organisadornan di e prome simposio a aprecia e presentacion di Marlandi Gracia, cu tabata hopi inspirativo. Aruba conoce un economia caminda tin espacio pa ofrece oportunidad pa miho calidad di bida pa tur persona cu ta forma parti di nos comunidad. Den cuadro aki e ta bay rekeri un esfuerso enorme cu ta inclui e mundo comercial pa asina nos por realisa un modelo economico fiha ariba sirbi “E BON COMUN”.

E tema aki ta punto di discusion bao di profesornan economico international manera Jean Tirole y Michael Sandel. Nan ta elabora extensamente referente e tema aki y ta duna e siguente inspiracion cu sigur tin relevancia pa Aruba;

“Economics works toward the common good; its goal is to make the world a better place.”

Un anochi interesante di reflecion profunda di diferente angulo. Den un auditorio yen  tema “ E BON COMUN” a wordo lansa cu ta crea un ambiente di speransa den un temporado di hopi reto difisil.