Ta hopi obvio cu Evelyne Wever-Croes ta hungando un wega hopi deshonesto den e asunto di intrega di e 12.6% di salario di trahadornan publico. E ‘storia’ cu ta cu Hulanda mester bai atende e asunto aki ta un trocemento di con cosnan a cana di berdad. Pasobra ta Evelyne Wever Croes a ofrece Hulanda e reduccion di 12.6% ora e tabata den “default” cu su propio“Beleidsplan Verlaging Personeelslasten” (BVP) cu e a presenta na Conseho di Reino na 2018. Prome cu e crisis di COVID!

100 MIYON DI EXTRA GASTO NA 2018

Tur cos ta cuminsa cu e promer presupuesto di Gabinete Wever-Croes na 2018. Apesar di a critica e gobernacion anterior pa defict, ya den su promer salida Gabinete Wever-Croes a presenta un presupuesto cu casi 100 miyon, pa ta exacto, cu 98.6 miyon di gasto mas halto cu e gobernacion anterior. Den su reaccion riba e presupuesto aki CAFT a scirbi dia 8 di november: “Inmiddels is duidelijk dat het tekort in de BW hoger uitkomt dan de realisatie van 2017 en dat de totale kosten in de BW ten opzichte van de realisatie 2017 met AWG 97,8 miljoen zijn gestegen. Het CAft constateert dat aan de afspraken om te komen tot houdbare overheidsfinanciën onvoldoende invulling wordt gegeven”.

CAFT: GABINETE WEVER CROES NO TA CUMPLI 

Na e momento cu Gabinete Wever Croes, contrario na su promesa, a keda sin cumpli cu reduccion di gasto y hasta a aumenta gasto, Gobierno Hulandes a dicidi cu lo mester prolonga e structura di supervision di CAFT. A exigi di Gabinete Wever Croes un ley pa prolongacion di CAFT y un plan concreto di reduccion di gasto.

BELEIDSPLAN VERLAGING PERSONEELSLASTEN (BVP)

Para dilanti di e situacion di incumplimiento aki, Gabinete Wever Croes na final di 2018 a core prepara un proposicion di cortamento di gasto, pa Conseho di Reino no impone un ‘aanwijzing’ riba Gabinete Wever Croes. Den e proposicion aki a presenta e “Beleidplan Verlaging Personeelslasten” BVP. Medidanan cu a priminti den e beleidsplan ta: “Beperken Instroom; Aflopende Arbeidscontractanten per jaar; Overtime Executieve Diensten; Stimulering uitstroom; Uitstroom Gepensioneerden; Disciplinair ontslag, Stringente Beleid”. E esencia di e proposicion tabata cu lo minimalisa tumamento di hende den servicio, lo retira un cantidad di empleado publico dor di no renoba nan contract ora esaki termina,stop contractnan cu pensionadonan y tambe lo retira esnan cu no ta cumpli cu servicio. Tambe lo a para e automatismo den aumento di salario a base di e sistema di ‘periodieke verhoging’. Ningun momento a papia di bai reduci salario di empleadonan publico.

BVP LO A PRODUCI 48.6 MIYON NA REDUCCION DI GASTO

Riba pagina 10 di e “Beleidsplan Verlaging Personeelslasten” (BVP) tin poni e sumanan exacto cu Gabinete Wever Croes a priminti Hulanda na 2018 cu lo bai reduci den gastonan di personal a base di e mecanismonan menciona den e BVP.   E ‘beleidsplan’ ta bisa literalmente: “Naar verwachting zullen deze mechanismen per jaar de volgende besparingen leveren op de totale personeelslasten van het Land: 2018 een besparing van 12.2 miljoen; 2019 een bespraing van 11.7 miljoen; 2020 een besparing van 9.9 miljoen en in 2021 een bespraing van 14.8 miljoen.” En total a priminti un reduccion di gastonan di personal di 48.6 miyon di florin cu e 7 mecanismonan aki. Ningun di e mecanismonan aki a papia di reduci e salario di empleadonan publico. Pero mientrastanto e problemanan cu Hulanda a cuminsa escala, pasobra 2018 a pasa, 2019 a pasa y nada di cumplimento cu e plan pa reduci gasto (BVP). Hulanda a cuminsa perde pasensihi. Un biaha mas tabata tin un ‘aanwijzing’ ta colgariba cabez di Evelyne Wever Croes.

E TRIKI GRANDI DI EVELYNE WEVER CROES

Na maart 2020, cu yegada di e virus na Aruba, Eveyne Wever Croes a mira su chens pa usa un triki grandi pa sali for di su precancia cu Hulanda cu tabata escalando pa motibo di su incumplimiento. Mal usando y abusando di e sentimientonan di solidaridad den comunidad cu e tragedia di e pandemia, Evelyne Wever Croes a ‘goochel’ e idea di 12.5% di entrega di tur empleado publico for di su sombre. Ki un bunita idea: tur empleado publico lo juda carga e reto di e crisis di e pandemia. Ki casualidad cu e cortamento di 12.5% di salario di trahadornan tabata alrededor di mesun suma di 50 miyon cu a priminti na reduccion di gastonan di personal via di otro mecanismonan den e BVP. A hunga un wega cu e “buena fe” di empleadonan publico y nan sindicatonan cu no a conta cu e astucia aki. 

AWOR E TRIKI A KEDA DEVELA Y E MAGIA A KEDA DESENMASCARA

Den Eerste Kamer secretario di estado Knops, a cuminsa devela e triki. “Ta Evelyne Wever Croes mes a bin cu e proposicion di e 12.5%” e mandatario a laga sa. Hopi liher su tras e cartanan di CAFT a haya relevancia den e contexto aki pa mustra con cosnan a cana realmente. Den un carta fecha 1 di december 2020 ya CAFT a laga Evelyne Wever Croes sa cu no ta e 12.5% pa medio di reduccion di salario e a priminti, pero tabata ehecusion di su ‘Beleidsplan Verlaging Personeelslasten’ (BVP). CAFT ta reclama cu nada a keda ehecuta desde 2018 y ta exigi cumplimento:  “Het CAft constateert dat, alhoewel de personeelslasten door de 12,5 procent korting zijn gedaald, dit niet het gevolg is van het Beleidsplan verlaging personeelslasten (BVP). Het CAft vraagt Aruba om de uitvoering van dit plan zoals is afgesproken ter hand te nemen”. Berdad a alcansa e mentira di Evelyne Wever Croes! Awor e ta bisa cu mester puntra Hulanda pa duna bek e 12.5% cu a corta den salario, cu e mes a malusa pa tapa e buraco di incumplimiento cu e ‘Beleidsplan’. E líder di fraccion di AVP, mr. Mike Eman ta termina bisando cu Evelyne Wever Croes a hinca miles di trahado den un situacion hopi dificil, djis pa tapa su mesun erornan, su falta di cumplimento y su falta di honestidad. Esaki ta ‘haci lo corecto ora pueblo no ta wak’ ? Aruba ta sufri y malicia asina ta haci e dolor ainda mas grandi!