Diaranson a tuma luga e reunion publico den Parlamento relaciona cu e maneho di desperdicio di sushi, y diferente parlamentario a bin dilanti cu hopi pregunta skerpi pa busca mas claridad riba e ley cu Minister Otmar Oduber ta empeña pa pasa. Parlamentario Benny Sevinger na su turno a bin cu varios observacion cu a laga e publico presente sumamente consterna.

Kico ta e solucion cu e gobierno aki a presenta?

Den e buki “Economic Policy” cu ta di e gobierno actual, Parlamentario Sevinger ta lesa textualmente for di pagina 49 pa asina evita cualkier confusion of duda y ta bisa: “ Waste Management is high on the agenda of the Government, an estimate of 300 million dollar project based on a Build/Owned/Operated and Construction”. Un proyecto cu na florin lo ta aproximadamente 500 miyon cu nan kier bin cune y poni den e programa di Gobernacion. No ta algo cu a inventa, pero ta algo cu ta poni claramente den nan programa.

E suma ey ta dos biaha e hospital nobo of Green Corridor y Watty Vos Blvd pareu!

Pa e desperdicio di sushi ta bay paga dos biaha e balor cu e hospital nobo cu Aruba tin actualmente. Na momento cu bay inverti 525 miyon florin den un planta nobo/compania nobo prome pregunta cu lo bin di parti di e compania aki na e MInister lo ta, con e ta bay haya e placa ey bek. Ken ta page bek ? Despues di 20 aña na e prestamo so lo tin cu paga 1.3 BIYON florin. Incluyendo costo di administracion, ganashi y demas poni hunto, e compania aki tin cu haya na entrada un suma di 70/80 miyon florin pa aña. Na su luga e compania aki lo puntra e Minister ta con e ta bay haci pa yega na e entrada aki, caminda na su turno riba pagina 25 di e destaho ta bisa cu e compania nobo tin 4 manera pa haya placa. 

E prome opcion pa e compania yega na e placa ta cu e la inverti ta “Tipping fee”

Tur sushi cu bay na e compania nobo aki tin cu paga pa cada “metric ton” tonelada di sushi. Cu un calculacion cu e Minister a duna di 90 mil ton di sushi cu pais ta produci, excluyendo esnan cu no por kima manera auto, wasmachine y no mas cu 10% di taira, dividiendo esaki den e 70 miyon florin ta yega na un suma di mil florin pa metric ton, ta locual cu parlamentario Sevinger a splica. Bisando esey, cada ciudadano cu  tin cu haci uzo di e compania nobo aki pa desperdicio di sushi lo tin cu paga mil florin pa cada metric ton. Por ehempel un baki di 20 yarda of 30 yarda sea di Serlimar/Ecotech of cualkier otro cu tabata costa 200/250 florin, awo lo keda pisa per metric ton door di e compania nobo. Si acaso na momento di pisa e baki bo tin 2 of mas metric ton ( tonelada ) ta nifica un bedrag di 2 mil florin pa paga na desperdicio na e compania nobo.

E segundo opcion pa e compania nobo gana su placa lo ta for di W.E.B

Proposicion lo ta pa bende coriente na WEB pa nan por haya entrada, indicando pagina 29 di e destaho, caminda ta poni cu lo tin cu paga pa Kw uur, cu un cifra di 7 cen menciona pa e Minister cu intencion pa draai 6 Mw cu lo ta un suman di 6 miyon cu e compania nobo aki lo por ricibi. Si mira cu for di 70/80 miyon por kita e 6 miyon ey, e resto lo tin cu bin di sushi di pais Aruba.

Parlamentario Benny Sevinger ta pone enfasis un biaha mas riba e palabra clasico “Tipping Fee” cu lo keda traduci na: trece sushi, pisa e sushi ey, paga esaki y asina ey e compania lo draai. Ta e realidad bisto cu tin tras di e compania nobo aki.