Parlamentario drs. Mervin Wyatt-Ras den un comunicado ta trece padilanti cu e promer tratamento di radiologia of bestraling na IMSAN dia 1 di april cu a pasa ta un logro grandi pa pais Aruba y en particular pueblo di San Nicolaas.
Pashentnan di cancer cu antes mester a viaha pa otro pais pa ricibi tratamento medico awor por haya esaki na Aruba mes.
Nos hendenan cu tin cancer por haya tratamento den un facilidad bon equipa y acredita segun JCI. Por bisa esaki ta vision di partido AVP y e minister anterior encarga cu salud, sr. Richard Visser, cu a haci e contactonan necesario e tempo ey cu un hospital renombra na Florida, Baptist Health.
Dr. Rajnherc cu a inicia e trajectoria aki a persevera cu sosten di profesionalnan rond di dje y a logra.
Wyatt-Ras como anterior presidente di e comision encarga cu Salud na diferente ocasion den pasado a follow up con ta bai cu e proyecto den diferente reunion di comision. Fraccion di Avp a presenta diferente mocion pa sostene e proyecto y durante varios discusion durante IPKO den Reino a keda trece padilanti e importancia di tin un Centro di Radiologia pa Aruba. A mustra riba a ventaha di baha gasto y di por atende tambe pashentnan den Reino.
Tin cu duna Cesar loke ta di Cesar. Paso no ta tur politico a kere den e proyecto aki, mientras awor nan kier pronk cu pluma di otro.
Den gobernacion di AVP a haci tramitenan hunto cu AZV pa asina logra financiamento di e proyecto aki cu no tabata uno rapido. Alabes a amplia e proyecto. E gobierno actual a hereda esaki y gracias na perseveransa di e director y profesionalnan cu ta traha cun’e na IMSAN awe por tin e logro aki.
Wyatt-Ras y coleganan di fraccion den Parlamento recientemente a haci un bishita na IMSAN pa ricibi informacion di e proyecto aki.
Wyatt-Ras ademas semper a y lo boga pa establece turismo medico na nos pais pa medio di e.o. tratamento oncologico na IMSAN. Pa di e forma aki trece diversification di nos turismo. Mirando e sitiacion actual cu e crisis di coronavirus esaki lo no ta posible riba termino corto, sin embargo pa cuminsa siguramente ta urgente pa trata nos propio hendenan cu cancer na Aruba.
E hecho cu e pashent por keda aki mes lo baha gasto di AZV y tambe lo ta na beneficio di mehoracion mas rapido di e pashent. Esaki lo haci posibel tambe cu e pashent por keda traha mientras e ta haya su tratamento y por permanece den seno familiar. Mervin Wyatt-Ras ta felicita dr. Rajnherc, personal medico/di cuido/di limpiesa, ambulans y tur cu a coopera,cu e gran logro aki.
