Parlamentario drs. Mervin Wyatt-Ras hunto cu su coleganan dilanti Parlamento a reacciona riba e hecho cu sra. Dapney Lejuez a tuma su retiro for di Mep y a declara su mes independiente. Como hende muher Wyatt-Ras y tambe su fraccion ta orguyoso di Daphney cu ela tuma e curashi aki, pasobra no ta facil. Wyatt-Ras ta trece padilanti cu e mes a pasa aden cu partido Mep. Nan a sake for di partido. El a experencia cu fraccion di Mep cu na momento cu tin discucionnan fuerte, partido semper ta laga esun cu ta duna su opinion y ta para pa su principionan un banda pa nan bai nan caminda. Den e caso aki nan kier mantene e coalicion. Sra. Lejuez un dado momento no por a carga esaki mas y si bo wak ariba internet tur reaccionnan cu tabatin den direccion di su persona, acusacionnan, tur esakinan a conduci na e decision tima dor di sra. Lejuez. 

Wyatt-Ras su persona a pasa aden. Ora bo tin diferencia di opinion den Mep mes ora bou capa di fake accounts nan ta bin ta critica bo na in forma bao nivel. Esaki no ta e manera pa hiba politica y eynan bo por weita cu partido Mep a cambia su popchinan pero e circo a keda mescos. Pues apesar di e generacion nobo den e partido e mentalidad a keda mescos y anticua. Si skucha locual cu sra. Daphney Lejuez a trece padilanti el a cuestiona e ley di Serlimar. Paso esey ela duna como su motibo principal pa sali for di e partido. El a critica e forma con e ley di Serlimar kier ser pasa caminda e ta bisa cu no tin transparencia, no ta cumpli cu principionan di bon gobernacion y tampoco cu principionan di integridad. E ta cuestiona cu no tin un businessplan y no tin un relato financiero. Asina tin diferente punto pa loke ta trata contenido di e ley cu e no por haya su mes aden. 

E ta bisa alavez cu e no por acepta cu gobierno ta pone man den saco di pueblo sin cu esaki ta wordo hustifica y sin tin un ley di afvalstoffenheffing y sin un Milieuwet. El a combersa cu Minister Presidente tocante su puntonan. E Minister Presidente atrobe ta ganja pasobra el a bis’e cu e ley lo wordo “ingetrokken”, sinembargo despues di esey e minister encarga cu asunto di Serlimar a bai den prensa y sigui papia di e ley. E Ministro Presidente hasta a menase. Lider di fraccion, sr. Rocco Tjong tambe a reacciona hopi mahos, caminda e ta bisa cu interes personal di sra. Daphne Lejuez ta prevalece ariba bienestar general, mientras cu tur hende cu a sigui e reunionnan por a tuma nota cu sra. Lejuez tabata critico y a cuestiona diferente punto esencial di e ley. Wyatt-Ras y su fraccion tambe tabatin mesun puntonan di critica y pueblo tambe (t)a cuestiona e puntonan aki. E lider di fraccion di Mep envez cu e ta wak e puntonan aki e ta bai critica integridad di e parlamentario aki. Banda di esey durante e declaracion di sr. Tjong el a admiti cu el a ganja den Parlamento. Tabatin un Centrale Commissie durante cual a prohibi sr. Sevinger di viaha dor cu “zogenaamd” e ta bou investigacion ”strafrechtelijk”.  A discuti masha fuerte encuanto di e asunto aki paso bo no por prohibi of mina e representacion di un parlamentario paso e ta representa su pueblo cu a eligi’e y a pone eynan y e tey pa representa su pueblo cu a vota p’e y bo no por bin den un comision ni fraccion chikito pa elimina cierto derechonan cu e tin como Parlamentario. Sr. Rocco Tjong a trece padilanti cu e ta papia pa full su fraccion. Awor durante conferencia di prensa e mes ta bisa cu sra. Daphney Lejuez a sali for di chatgroup na momento cu nan tabata discuti e asunto di viaje di e parlamentario bou supuesto investigacion. Kiermeen cu sr. Rocco Tjong a ganja nos fraccion y tur presente den Parlamento Ora cu el a bisa cu e por papia pa su fraccion. Awor ta resulta cu no tur miembro di su fraccion tabata di acuerdo cun’e. Pesey nos tin cu bai bek den reunion di comision central pa discuti e asunto aki. 

Un otro punto cu ta importante pa bisa ta cu sra.Lejuez ta wordo critica di tur manera den medionan social, sinembargo mei mei di fraccion di Mep tin persona cu ta wordo cuestiona pa nan integridad. Nos fraccion tin proces-verbaal di sr. Bergen den cual su esposa ta declara. El a bai polis. El a duna keho of denuncia y a pidi pa strafvervolging di e persona Bergen cu a maltrata nan yiu muher. Esaki no ta wordo cuestiona dor di fraccion di Mep. Kizas esey ta normal pa nan. Nan no ta cuestiona e meneer aki pero si sra. Daphney. Kiermeen tin ley pa un y no pa otro. 

Wyatt-Ras a conclui deseando Daphne Lejuez hopi forza. E ta bai enfrenta un temporada hopi dificil. Wyatt-Ras a pasa aden. Tur dia nan lo acus‘e, tur dia nan lo bai critik’e y nan lo bai rebah’e riba social media. E minister Presidente actual tempo cu Wyatt-Ras tabata Parlamentario cu a ser saka for di e partido y despues a declara su mes independiente el a skirbi un articulo masha bunita, despues ela skirbi un articulo sin su nomber poni pa caba cu mi persona y integridad. E actual presidente di Parlamento tabata tira palabra y bully y e actual minister di finanzas tabata habri su boca grandi pa acusa sin cu esaki ta cuadra cu berdad. Wyatt-Ras ta desea sra. Lejuez hopi forza y manera cu a menciona anterior e popchinan a cambia pero e circo a keda mescos. Mep ta e mesun partido cu Wyatt-Ras a conoce. Ora nan no gusta bo of no ta di acuerdo cu bo opinion, nan ta trata bo malo y hasta bully. Daphney a para fuerte como hende muhe y como profesional y ta desee hopi forza pa e sigui cu su trabou cu ta pa para pa interes general di Aruba y no interes di coalicion sino interes di nos pueblo.