Lider di Partido AVP Mike Eman no por compronde e reaccion di e politiconan di MEP riba ponencianan cu AVP y su persona a trece, riba resultadonan di estudio haci dor di Banco Central di Aruba.
Tur pero tur dato duna den e presentacion tin como fuente Banco Central di Aruba y bao di tur grafico a pone BCA como fuente. Esey ta un hecho. E graficonan tur ta ilustra exactamente locual e rapport di Banco Central a duna na informacion y datos. Y bao di tur grafico a pone cu Banco Central ta e fuente manera normanan internacional ta prescribi.
“Tur e reaccion di Gobierno y esunnan cu ta sostene Gobierno ta trata di mitiga e realidad penoso di e rapport aki y hasta di purba kita credibilidad di e fuente di tur e datonan aki,” Eman a bisa.
Pa cuminsa e lider politico den forma categorigo a bisa cu cada cifra cu nan a haya den e rapport di Banco Central, cada un a wordo ilustra corectamente den e ilustracionnan y bou di cada ilustracion a pone cu e fuente (di e datonan) ta BCA.
Tin di e graficonan aki ta di BCA y otronan cu a keda presenta dor di AVP ta basa riba e cifranan di Banco Central di Aruba. Eman a duna ehempel di un cantidad di tabel y grafico cu tin den rapportnan caminda e grafico ta obra di esun cu ta presenta of publico y bao di e grafico ta pone e fuente di unda a haya e dato pa e grafico. Y esaki ta exactamente locual a worde haci. Y ningun hende por bisa cu algo no ta klop ni den contenido ni den e reglanan sigui di citacion pa un publicacion asina.
E lider ta haya poco straño cu di parti di Gobierno ta trata di pone intimidacion pa mira si “di e forma aki por kita algo di e realidad cu nos tur mester tuma como serio.
Esta e hecho cu e resultado di e surveya ta bisa cu comercio a perde confiansa den economia di Aruba, a perde confiansa den nan propio resultadonan, e contestanan di e encuesta di BCA ta mustra cu benta a cay dramaticamente, inversionnan awe y esunnan planea tambe a cay.”
Gobierno pa crea duda rond di e mensahe, ta trata di crea duda si AVP a tuma e datonan manera debe ser. Awe un vez mas AVP ta prueba cu e datosnan ta klop y e reglanan di citacion a worde sigui a pie de la letra.
Pa loke ta e cuestionamento di e graficonan uza, e lider a duna e ehempel di un relato di Banco Central mes. Den un di su publicacionnan por ehempel tin grafico di turismo cu nan mes di Banco di Central a traha, pero abou ta skirbi cu e fuente di e datonan ta ATA. Y hustamente ta esaki ta e mesun procedura cu ExPromer Minister Mike Eman y AVP a sigui den nan presentacion. Cada grafico ta responsabildad di AVP a mustra claramente cu e fuente ta di e cifranan di Banco Central su survey. .
Esaki ta wordo haci den tur rapport, presentacion, of relato di instancianan. Cada ken ta traha nan mesun tabel, pero importante ta pa semper bisa cual ta e fuente y esey mester aparece bou di e grafico diseña. Y esey a worde cumpli cune debidamente.
Pero “e problema cu e Gobierno y e fraccion cu ta sostene e Gobierno aki tin ta cu ora mira e realidadnan cu ta sali di e rapportnan cu e “business perception index” a cay, ta cu dor cu Banco Central ta wordo relata na e estudio aki, e ta duna e credibilidad necesario cu no ta Mike Eman of AVP ta bisa esaki, sino e ta bin di datonan di un rapport di Banco Central di Aruba.
Pa e motibo ey a purba di crea un ‘smokescreen’ pa no mira e realidad di e cifranan.”
Lider di AVP a repasa pagina pa pagina cu Prensa loke el a trece dilanti den e grafico y riba ki pagina di Banco Central (resultado di e survey) e ta aparece y a demostra di e forma aki cu no ta trata cifranan imaginario sino di Banco Central.
“Banco Central sa cu e cifranan ta di nan pasobra ora cu nan a scirbi e carta, cu nan a haya nan forsa pa skirbi dor di Minister di Finanza y ta mustra e esfera di intimidacion bou cual e institutonan aki mester traha. No ta aceptabel pa nos sistema hudicial, ora di veredictonan, ta haya atakenan di minister, no ta aceptabel cu Ministerio Publico tur dia ta wordo poni bou di presion, Warda nos Costa, Polis y tambe y awor Banco Central.
Tin bes mi no sa kico ta pio, si ta e cifranan alarmante cu tin nos asina preocupa of e intimidacion cu nos ta mirando ta tumando luga di institutonan, te cu Banco Central mester skirbi un carta pa juda gobierno, pero cu en realidad ta cuestiona nada di verecidad di e informacion duna den e presentacion di AVP.
Ora cu bo lesa e carta bo ta saca diferente conclusion. Ningun caminda den e carta BCA ta bisa cu e cifranan cu nos a presenta den e presentacion ta incorecto. Ningun caminda BCA ta bisa cu ora sr. Eman a bisa cu tin un caida di percepcion pa loke ta rumbo di nos economia, cu esaki no ta corecto y asina Eman a duna mas ehempel..
ExPromer Minister Mike Eman a finalisa bisando: “E cifranan aki den nos presentacion no parce di Banco Central nan ta di Banco Central”.
