Segun sra Arends-Reyes dia 6 di februari 1995 reino Hulandes a ratifica e tratado internacional di derechonan di mucha caminda cu Aruba tambe lo mester cumpli cu e tratado aki pa respeta e derechonan di tur mucha bibando ariba nos isla. Awe 20 di november ta un dia sumamente special dedica na tur mucha rond mundo, nan derechonan y specialmente nos muchanan di Aruba.
E importancia pa tur mucha, sin excepcion, ricibi e atencion, cuido, formacion y proteccion, ta di vital impotancia no solamenta pa nan propio interes pero tambe di nan famia y di comunidad ya cu muchanan ta e base di progreso di un pais.
Generacion tras di generacion ta hunga un rol importante den desaroyo di tur pais rond mundo y tambe aki na Aruba y ta na su luga pa rond mundo awe tur hende para keto un rato y realisa e necesidad urgente pa cuminsa brinda mas atencion na bienestar di nos muchanan cu mester ser refleha den tur e decisionan di gobierno. Y politica por ser keda hunga y sigui bin cu excusa pa no asumi nan responsabilidad como gobernante pero tempo ta keda pasa y pueblo ta sinti cu tur locual a priminti den campaña ta netamente lo contrario ta pasando.
Sra Arends- Reyes ta kere cu aki na Aruba ainda nos falta pa sigui fortifica y traha un sistema solido y organisa cu ta atende cu interes di nos criaturanan chikito manera cu mester ta, principalmente den ultimo aña caminda ainda gobierno no por ehecuta su plan social cu a aloca un suma pero no tin mucho accion concreto riba dj’e basa ariba metanan fiho, cu cifranan of percentahenan cu kier logra disminui, pa asina por midi si ta logrando of no. Banda di esaki a priminti cu pagamento di schoolgeld lo pasa pa pasado, lo duna cuminda na skol pa tur mucha, tur skol lo haña airco, lo bin cu un staatscrèche, lo duna amnestia, lo introduci castigo minimo y asina e lista ta continua.
Nos comunidad ta wordo conmovi luna tras di luna cu casonan tragico caminda muchanan ta bira victima of ta perde nan bida caminda cu ta ponebo refleciona con lo por mehora e sistema pa asina nos muchanan no ta esunan cu mester sufri e consecuencia. Nos muchanan no mester tin preocupacion si lo tin cuminda riba mesa of no, of si su mayornan lo keda cu trabou, si tin placa pa gasolin pa hiba nan practica deporte, si a resta placa despues di paga awa of coriente pa cumpra cuminda of si nan tin cu warda 3-4 ora prome cu wordo yuda na dokter of hospital. Aruba ta pasando den momentonan dificil caminda cu tur decision di gobierno tin efecto y presion ariba nos famianan na Aruba. No tin mucho claridad pa e instancianan caminda ta specifica kico nan tin cu haci extra banda di locual nan ta hasiendo caba y con nan tin cu funciona cu otro y kico ta wordo spera di nan den e vision di gobierno aki riba proteccion di nos muchanan, tanto for di abuso sexual, como maltrato ficiso, maltrato verbal y neglihencia.
E aspecto mas serio ta e hecho cu no tin indicacion tampoco a corto plazo cu gobierno lo presenta accionan, gobierno ta continuamente den defensa y ta parce di ta lubida cu ta nan ta den e stoel awo y ora cu analisa e aspecto di un bon cuido di nos muchanan, manera nan derecho riba bon alimentacion, derecho riba recreacion, derecho riba un bon educacion y siguridad, nos por mira un desaroyo cu no ta mucho positivo.
Un gobierno cu semper a cuestiona e ‘bestaansminimum’ cu no ta suficiente pa un famia por biba di dje, a dicidi di impone un pakete di medida riba pueblo cu a converti loke nan mes a critica den un situacion ainda mas serio, ya cu famianan di entrada abou, ta esunnan cu mas ta sinti e efecto di e pakete di medida di gobierno.
Mientras cu a priminti cu lo aumenta salario minimo pa yuda esunan den necesidad, a priminti cu lo aumenta onderstand y otro decisionnan pa yuda e grupo aki y asina sigura muchanan un miho cuido y miho alimentacion, a converti esaki den un problema mas serio ainda.
Riba e dia di awe nos tin cu conclui cu Aruba su muchanan ta esunan mas afecta pa e desaroyo financiero y economico ocasiona pa un gobierno cu no ta cumpliendo cu tur loke el a priminti di haci durante di campaña electoral.
Sra Arends- Reyes ta spera cu lo tin cambio den esaki pronto cu tur famia, principalmente muchanan nan mayornan por haya e respaldo necesario pa asina nan cuido y desaroyo ta esun apropia caminda bon alimentacion y alegria ta domina nan bida na luga di e lucha di nan mayornan pa trata di logra suficiente pa nan por percura miho pa nan yiunan.