E proceso di ‘Scucha, Pensa, Recupera Miho’ di partido AVP ta pa scucha mas tanto hende y grupo di tur sector di nos comunidad posibel, pa recoge tur e sentimentonan cu tin den nos pais, tur e preocupacionnan, tur e ideanan, pa tene cuenta cu esakinan den e plannan di AVP pa siguiente gobernacion. Den e cuadro aki un delegacion di partido AVP a reuni cu San Nicolas Business Association (SNBA). Lider di AVP, Mike Eman tabata contento cu e reunion aki. Ela mustra cu San Nicolas semper tabatin atencion AVP, pa motibo di e contribucion grandi cu San Nicolas tabata tin pa desaroyo di Aruba riba hopi tereno y pa motibo di e capacidad grandi di San Nicolas y vecindario pa bolbe crece. “Semper un di e obstaculonan hopi grandi pa e desaroyo di San Nicolas, tabata e acceso pa San Nicolas. Diferente hotel a keda sin bin San Nicolas pa motibo cu e conexion cu resto di Aruba no tabata adecuado. Cu e “Green Corridor” nos a kita e obstaculo ey y cambia tur posibilidad pa desaroyo di San Nicolas. Literalmente a habri un avenida nobo pa San Nicolas y cun’e, oportunidadnan nobo pa bolbe crece.”

INFRASTRUCTURA & MEDIO AMBIENTE

Otro punto cu pa AVP semper tabata importante ta pa crea e “condicionnan necesario” o sea e asina yama ‘randvoorwaarden’ cu lo por haci diferente tipo di desaroyo economico y social nobo posibel. Un di e “condicionnan necesario” aki ta un bon infrastructura, edificionan cu ta mustra nechi, cayanan den bon condicion y cu luz di caya, scolnan den bon condicion y un ambiente agradabel pa biba. Durante di nos gobernacion anterior nos a haci hopi inversion den crea e “condicionnan necesario” ey. Nos a restaura edificionan manera Watertoren, San Nicolas Store, facilidadnan manera Joe Laveis Sport Park, a renobacion scolnan y barionan completo manera Yuwana Morto, Village, De Vuyst, Kustbatterij te cu Yara. Tur e proyectonan aki ta parti di un vision mas grandi pa henter e area “pariba di brug”. E vision tey. Despues di e paro di ultimo cuatro aña, nos tin cu sigui ehecuta e vision aki. Pesey nos kier a scucha tambe di San Nicolas Business Association, pa tende con nan ta mira e futuro di San Nicolas, kico ta nan prioridadnan. Si ta industria, si ta turismo, si ta comercio of ta un combinacion di esaki nan ta wak pa desaroyo economico di San Nicolas y vecindario.

DESAROYO BALANSA

A reuni cu SNBA y nan a mustra cu nan kier mira un desaroyo diversifica y balansa, mescos cu partido AVP ta mir’e.  Mescos cu AVP nan ta convenci cu den tur desaroyo pa stimula economia y crea trabou, mester tene cuenta cu medio ambiente y cu e herencia cultural di e area. Den e plannan cu partido AVP ta desaroya awor, ta duna prioridad na restauracion di edificionan en vez di traha nobo. Dor di haci esey ta conserva cas y edificionan bieu y monumental, mientras ta crea trabou di nivel di experticio halto den construccion y ta evita mas tanto posibel pa usa areanan nobo di naturalesa. San Nicolas ta duna e oportunidad pa pone e plannan ey den accion. Na San Nicolas tin hopi edificio di hopi aña cu ta den condicionnan malo awor aki. Un maneho di inverti den restauracion, den renovacion y haci uso nobo (‘repurposesing’), lo trece un cambio hopi grandi den San Nicolas. Cu e tipo di maneho balansa aki lo crea hopi trabou y lo por acopla esaki cu cualkier desaroyo manera turistimo, empresanan chikito of cu redestinacion di e area di refineria pa industrianan limpi. Tur e posibilidadnan aki lo ta riba mesa atrobe den un maneho balansa di AVP.

DESAROYO PARTICIPATIVO

Mescos cu den pasado, AVP ta haya cu mester dicidi hunto cu San Nicolas kico lo ta e futuro di e area industrial di e refineria, kico ta e futuro di e desaroyo di turismo na Aruba y na San Nicolas y con nos ta bay proteha areanan natural y desaroya areanan publico. San Nicolas tin hopi preocupacion cu e desaroyo actual cu ta bayendo demasiado incontrola. Sin un vision balansa cualkier desaroyo – tambe turismo – por bay a costo di areanan publico cu nan ta aprecia masha hopi mes na San Nicolas, manera Sero Colorado, Babybeach y Rodgersbeach. Mester haci cualkier desaroyo den dialogo cu esnan mas serca y cu mas lo por wordo afecta. Pa AVP e dialogo, manera cu San Nicolas Business Association, ta sumamente importante, pasobra e ta duna hopi bon informacion di balor pa trahamento di plannan pa San Nicolas y vecindario.

PARTNERNAN CONFIABEL

Mike Eman mes a keda contento di tende e plannan y sinti e entusiasmo y optimismo di miembronan di San Nicolas Business Association. “Un compliment pa San Nicolas Business Asociation. Nan ta tumando hopi iniciativa como un organisacion cu a surpasa hopi contratiempo cu San Nicolas. Apesar di tur cos, nan a mantene determinacion y e compromiso pa desaroya San Nicolas. Nos a tuma bon nota di tur nan idea y plannan. Den nos plannan di desaroyo nacional, e desaroyo di San Nicolas sigur ta bay tin un luga importante atrobe. E plannan aki lo resulta den e programa di partido AVP y den e programa di gobernacion pa futuro. Nos ta hopi contento cu e reunion aki cu personanan cu ta dedica na desaroyo di San Nicolas, c’un curason grandi pa San Nicolas. Nos a sinti y tende esey den e reunion aki. Despues di cuater aña di negligencia atrobe mescos den pasado, caminda nada a sosode, e plannan pa San Nicolas mester bay duna speransa nobo. Tin uncompromiso di un hotel na San Nicolas. Ban spera cu e lo wordo realisa. Pero den un forma balansa y cu bon proteccion di medio ambiente y di areanan publico. Pa logra esaki partnernan manera San Nicolas Business Association ta indispensabel. AVP mes tin e ‘trackrecord’ di planea bon y di tin ideanan hopi concreto y hopi visionario. Pero AVP tin un ‘trackrecord’ tambe di a cumpli cu loke e pone den su programa. Esey ta duna nos partido hopi credibilidad y confiansa den comunidad y cerca partnernan manera San Nicolas Business Association,” lider di AVP Mike Eman a declara.