Den su documento Financieel Economisch Memorandum, gobierno a mustra cu e desaroyo economico lo ta basa riba infrastructura, energia, aspecto social, innovacion  y tambe labor. “Esakinan ta exactamente e mesun pilarnan economico cu Gabinete Mike Eman I y II a traha riba dje, principalmente e parti energetico, e parti social como tambe e parti infrastructural y e parti di innovacion.

Pa forma e fundeshi pa diversifica nos economia, Gabinete Mike Eman a ehecuta un plan di inversion amplio riba tereno di infrastructura, areanan publico como tambe energia. E plan akia sirbi cuatro proposito: Jump start economia cu tabata gravemente afecta, frena deterioro di e poder adkisitivo di famianan, aumenta financiamento pa negoshinan y crea cuponan di trabou.

Bo por wak rond tur loke nos a logra  riba tereno di turismo, infrastructura, energia y tambe den areanan publico.

Awe ta testigo di un waf di container ultramoderno na Barcadera cu ta cumpli cu reglanan estricto internacional, obranan infrastructural di mas grandi di e ultimo 30 añanan, un hospital state-of-the-art cu por bira un centro di economia di conocemento, areanan rond di nos refineria cu pa e ultimo shen añanan tabata inaccesibel pa nos y awe nos por usa nan atrobe y un area cla pa desaroya na nos waf di crucero na Oranjestad.

 

Ta di lamenta ta e hecho cu den e maneho economico a elimina e 4 topsectornan pa desaroyo di nos economia por completo, cual ta industrianan creativo, exportacion di conocemento, tecnologinan limpi y logistica. Nos a laga cinco areanan di oportunidad cla atras pa wordo desaroya y departamentonan ekipa pa por sostene e inversionistanan local. Den maneho economico nobo no tin espacio pa esaki cual ta di lamenta mirando cu hopi profesional den aparato gubernamental a traha hopi duro riba esaki. Acceso na conocemento, acceso na capital tampoco ta bisto den e presupeusto presenta y ta algo sumamente di lamenta pa loke ta trata e parti economico.

 

E weso di lomba di  e 4 topsectornan cu nos a identifica, ta empresanan local y chikito. Door di no inclui esakinan den e maneho economico, a pone empresanan chikito, inversionistanan local y trahadornan independiente a wordo poni un banda den e maneho economico cu gobierno a presenta.

E FEM ta ilustra un biaha mas un  falta di un maneho enocomico, di un vision economico. Nos ta ripara cu gasto di personal ta sigui aumenta structuralmente den proximo cuater aña  y entradanan tambe ta aumenta cu mas cu 10% pero no ta splica con esaki ta hinca den otroy ki efecto economico esaki lo tin,” Parlamentario Richard Gobierno ta spera ta genera mas di 100 miyon na entrada den e proximo añanan y esaki no ta concorda cu e crecemento economico cu Gobierno ta premira.

Bo no por ta spera di tin un crecemento economico y bo ta bay extrae e magnitud di capital aki di nos economia. Nos lo sigui di cerca ya cu e asuntonan cu ta rekeri hopi atencion.