Den cualkier pais rondo mundo, na momento cu gobierno dicidi di no sostene proyectonan educacional y formacion pa su hobennan, esaki ta muestra di un desaroyo negativo y peligroso. Un bon educacion y formacion di henter comunidad mester ta punto cardinal den maneho di cualkier gobierno. “E presencia di un academia di arte fini y diseño aki na Aruba ta forma parti esencial di Aruba como hub di conocemento y ta fungi como estimulo pa desaroyo di industrianan creativo como parti di diversificacion di nos economia,” Parlamentario Sr. Richard Arends pa fraccion di AVP a splika. “Simplemente sera e academia aki sin duna un opcion ta perhudica tur cu esuna ta atende e academia aki, pero ta demostra cu e 4 top-sectornan no ta forma parti di maneho economico di e gobierno actual.”
Futuro di un pais ta depende totalmente riba formacion di su hendenan, kendenan mester haya e oportunidad pa sigui specialisa nan mes riba cualkier tereno. Nan exito riba cualkier tereno di formacion y educacion, ta beneficia desaroyo di nos pais. E academia di arte aki no solamente a ricibi un sla formal pa motibo cu gobierno a cancela huur di nan edificio na Oranjestad, pero cu nan no a haña espacio pa ningun otro opcion pa acomoda nan facilidadnan. “E decision aki ta linea recta contra di e desaroyo economico nobo di bo isla basa riba e 4 pilarnan nobo, caminda industrianan creativo y exportacion di conocemento ta forma un actividad clave. Ademas e ta afecta nos studiantenan local directamente cu kier eherce nan talento aki na Aruba mes,” Sr. Arends a splika.
Na momento gobierno anterior bou signatura di partido AVP a yega na un acuerdo pa Rietveld Academie establece su mes aki na Aruba, esaki a brinda un oportunidad unico y pa prome bes den historia di nos pais, pa permiti tur esunnan cu kier sigui specialisa nan mes den e ramo di industrianan creativo na un nivel avansa pa hasi esaki na Aruba mes sin cu nan mester a sigui nan estudio y specialisacion na Hulanda. Rietveld Academie a forma parti esencial di e desaroyo di un economia nobo caminda hobennan a haya e oportunidad unico di por atende un academia asina reconoci, pa sigui cu nan formacion. “Ademas e ta posiciona Aruba riba un plataforma internacional pa usa Aruba comoo un hub di conocemento. E mesun formula ta aplicable pa e Green Faculty na Universidad di Aruba cu entretanto a cambia di nomber, ” e parlamentario a splika.
Ta di lamenta profundamente cu gobierno actual no ta respeta e balor y nificacion di e academia aki, e posibilidadnan cu e ta brinda na nos hendenan, como tambe pa desaroyo di actividadnan economico nobo cu ta basa riba empresanan mediano y chikito y empresarionan independienten. Te ainda despues di mas di 6 luna den goberncion, gobierno no a presenta su programa di gobernacion ni tampoco a presenta su maneho economico. Decisionan adhoc asina ta demostra un biaha mas cu no tin un vision conherente riba loke e kier logra como gobierno y confirma un biaha e falta di conocemento riba tereno economico.
