Fraccion di AVP a haci un bishita na Instituto Medico San Nicolas (ImSan), caminda cu nan a haya un rondleiding for di e director dr. Joel Rajnherc. Parlamentario Mervin Wyatt-Ras a bisa cu e fraccion a keda hopi impresiona pa e proyecto cu hopi aña a papia di dje den Parlamento. Dr. Rajnherc tambe den pasado a bin duna presentacion kico a logra cu e proyecto aki y pone un bunker, y asina haci tambe e tratamento di cancer na Aruba.
“Esey ta un soño di e tempo ey di dr. Rajnherc pero tambe di nos tur na Aruba. Ta haya cu e pashentnan hopi biaha ta bay pafo pa tratamento di cancer, tin cu keda simannan largo for di nan famia, for di nan yiunan, for di trabao cu consecuencianan financiero pa Gobierno.
Awo ta bay tin e tratamento, aunke no full cla ainda. Ta trahando na e finalisacion di e proyecto y pronto por conta cu apertura di esaki.”
Por a mira tambe cu a amplia e cambernan di operacion. Tin dos camber di operacion hopi bunita y high-tech y tambe un camber pa haci operacion di wowo.
Segun Wyatt-Ras, a haci e prome operacion di retina na Aruba, cual ta un logo grandi pasobra e pashentnan no mester bay den exterior.
Por mira e proceso y ta haya cu pashentnan di p’ariba di brug, tambe merece un bon tratamento. Mester tambe e cuido y si mira con e ambiente ta den ImSan ora cu a cana rond, e diferente profesionalnan ta hopi contento y satisfecho cu smile riba nan cara. Esey tambe ta duna e gana di bin e facilidad aki, caminda cu hopi hende ta comenta riba e luga cu yen di positivismo.”
E Parlamentario ta comenta cu esaki ta un proyecto cu sigur lo bay beneficia e pueblo. Cu e tratamento tambe di oncologia na Aruba, ta bay yuda e 200 pashentnan cu ta bay otro pais manera Colombia, Hulanda, etc. lo bay baha drasticamente y conhuntamente cu Baptist Health cu ta duna e certificacion di JCI, ta bay garantisa e calidad y pa coopera cu otro paisnan asina tambe.
A lo largo por bay introduci turismo medico. Pero awor aki cu Aruba ta den un situacion financiero decayente, unda cu CITGO tambe a cera su portanan, por bay enfoca riba esey tambe. E ora por haya un otro tipo di entrada pa pais Aruba. Un otro alternativa tambe pa pais Aruba. E ta un proyecto hopi positivo, Parlamentario Mervin Wyatt-Ras a comenta despues di nan bishita na ImSan.
