E siman aki e miembro di Parlamento den fraccion di Partido di Pueblo Arubano (AVP), mr. dr. Ryçond Santos do Nascimento, a reacciona riba e acusacionnan contra Chris Romero y Eddie Briesen. Ambos persona ta ex minister perteneciente na partido Movimiento Electoral di Pueblo (MEP).
Do Nascimento ta cuminsa na bisa cu awe MEP mester guli su palabra, specialmente esun di ‘integridad’. E motibo ta cu MEP a haci populismo cu integridad, uzando slogan manera “integridad, nace bo ta nace cu ne”. A haci hopi mercadeo cu integridad, pero Aruba no cuminsa drecha e sistema y e proceduranan, mientras cu e sistema ta sigui crea corupcion.
El a recorda con e mes a drenta politica door di, entre otro, duna curso riba derecho constitucional na Cas di Partido. E contrincantenan politico lidera pa Evelyn Wever-Croes a bagatalisa e cursonan como ‘universidad di corupcion’. E tempo ey actual Presidente di Parlamento Edgard Vrolijk a cuestiona Santos do Nascimento. Ex parlamentario Alan Howell, mescos cu minister Endy Croes tambe a haci politica barata riba su custia.
Awo cu no solamente Chris Romero y Eddie Briesen, pero tambe e ex minister plenipotenciario Guillfred Besaril ta bao investigacion penal, Vrolijk cu su ruman ta core copia duna curso di derecho constitucional na miembro di MEP. Sin embargo Vrolijk keto bay ta sigui tuma ordo for di Cocolishi.
E parti mas importante den henter e problematica di corupcion ta cu corupcion no ta djis un cuestion di ‘appel putri’. E ta un cuestion di con e sistema ta hinca den otro y e falta di procedura adecua: tin falta di division di poder y di “checks and balances”. P’esey e sistema por sigui corumpi hende pasobra “poder ta corumpi.” Cu poder ta corumpi ta algo cu algun hende, manera Evelyn Wever-Croes, no ta gusta pa e parlamentario bisa, pero cu ta berdad. “Si nos kier cambio, e solucion ta cu nos mester traha riba structuranan; nos mester traha riba e sistema,” asina Santos do Nascimento a declara durante di e conferencia di prensa. “Kiermen, si nos kier cambio den e pais aki, e no ta bay bin door cu mi ta mustra dede riba hende y bisa: ‘abo ta corupto’. Nos mester wak e sistema y kico falta den dje. Nos mester analisa e procesonan di trabou y check si e hendenan cu nos ta pone traha ta hende adecua pa e posicion ey. Kico ta nos structura pa evita fraude?”
E parlamentario di fraccion AVP ta sigura cu si nos no tin e structuranan pa evita fraude, ta bay keda haya situacion manera esun di Belastingsdienst caminda un funcionario a horta 1 miyon florin, of manera a sosode na Censo y te hasta na e propio Ministerio Publico. No ta regla debidamente e posicion huridico di e funcionario publico y esey ta pone den un situacion ainda mas vulnerabel pa corumpi.
FACEBOOK:
Pa pone un berdadero fin na corupcion mester analisa y coregi e sistema y procesonan actual cu ta duna espacio pa corupcion tuma luga. Cualkier persona, na un momento of otro, por sucumbi pa poder, pero door di educa, elimina oportunidad y necesidad pasobra e funcionario publico ta gosa di su derecho, por preveni corupcion.
E MEP populista a hay’e ta guli su mesun palabranan: “integridad, nace bo ta nace cu ne” .
