Dr. Ryçond Santos do Nascimento ta confirma su critica contra CAft Mr. dr. Ryçond Santos do Nascimento, experto den derecho constitucional, ta confirma cu a base di su expertisio riba e topico di derecho constitucional y structura estatal el a conseha parlamento y fraccion di MEP. Tambe e ta confirma cu pa varios motibo constitucional e ta critico pa cu CAft y e hecho cu e ley aki a wordo traha practicamente bao di e menasa di un intervencion pa medio di un KB (of AMvRB). Un di e motibonan cu dr. Santos do Nascimento ta asina critico pa cu esaki ta cu un KB ta producto di Rey hunto cu un minister Hulandes cu mester duna cuenta na Pueblo di Hulanda so. E minister Hulandes no tin di duna cuenta na Pueblo di Aruba. Si nos realmente ta kere den democracia e uso di poder aki ta ilegitimo. Pa e motibo aki mes dr. Ryçond Santos do Nascimento ta hopi critico pa cu henter e manera cu Hulanda a trata e cuestion di presupuesto 2014. E hecho cu Hulanda a forza e realizacion di CAft ta atacha nos autonomia, pa e motibo cu nos economia y nos finanzas publico ta forma e parti central di nos autonomia. Los di e contenido di su conseho dr. Santos do Nascimento ta expresa cu el a sinti su mes honra cu parlamento henter a deposita confianza den su experticio y e hecho cu su rapportnan y consehonan ta wordo studia y analisa cu hopi atencion. E ta aplaudi e curashi di lider di fraccion di MEP pa sigui sostene e politica nobo. Pues señor Rocco Tjon sa cu dr. Ryçond Santos do Nascimento a afilia su mes desde inicio di aña 2017 na partido AVP, cu e ta subraya e principionan Cristian Democrata y cu e ta apoya e vision di señor Mike Eman pa haci todo lo posibel pa trece felicidad den cada hogar. Den e cuedra aki dr. Ryçond Santos do Nascimento kier enfatiza tambe cu e ta compronde cu señor Tjon como politico tin biaha mester formula su mensahe na un forma politico. Pa e motibo ey dr. Santos do Nascimento kier elabora riba tres punto como reaccion riba e articulo di Rocco Tjon di dia 27 di Maart 2019 den differente media: (1) dr. Santos do Nascimento no a usa e termino ‘bende autonomia’ na niun momento, simplesmente pasobra e no tin niun prueba ni indicacion cu Hulanda lo a ofrece placa of fabornan politico pa niun partido na Aruba en cambio di mas poder. Es mas, hopi hende no ta realisa nan mes cuanto recurso Statuut ta brinda Hulanda pa interveni den Aruba su autonomia. (2) Statuut ta sufri di un deficit democratico manera dr. Mito Croes q.e.p.d. a enfatiza elocuentemente y tambe di un legaliteitsdeficit manera señor Booshi Wever y señor Ady Thijsen a demonstra convincentemente desde mas cu un decada. (3) Aruba a logra su Status Aparte bao liderazgo di Betico Croes q.e.p.d. y su team, pero John Van der Kuyp q.e.p.d. y otronan a recorda nos cu e lucha no a termina y cu nos mester vigila pa tur ataque riba nos autonomia. En corto, tur partido representa den parlamento ta subraya e importancia di nos autonomia. Ta hustamente p’esey dr. Ryçond Santos do Nascimento ta lamenta cu ambos partido grandi ta demonisa otro riba un cuestion unda nos mester mustra union, pasobra un pueblo ta bay perdi pa falta di concemento y un cas dividi no por keda para.