Durante conferencia di fraccion di AVP, parlamentario Mervin Wyatt-Ras a elabora encuanto preguntanan su persona a dirigi na minister di Turismo, Salubridad y Deporte pa loke ta trata e conferencia di cuatro pais di Reino. Durante e conferencia e paisnan a firma un acuerdo di cooperacion pa mehora cuido di salud di e paisnan y a haci palabracionnan encuanto programanan di prevencion, cooperacion entre hospitalnan, medicamento, cursonan pa profesionalnan y intercambio di informacion. Ademas a intercambia y palabra pa loke ta trata kico pa haci ora di catastrofenan, promocion di un estilo di bida saludable, deporte y movecion.
Segun Wyatt-Ras e imporancia di cooperacion entre e paisnan a ser enfatisa na diferente ocasion durante reunionnan di IPKO. A base di un inventarisacion di diferente facilidadnan, palabracionnan di cooperacion y posibilidadnan pa futuro y desventahanan den e cuatro paisnan di Reino e grupo di trabou di IPKO cu trekker Aruba a logra pa gobierno di Aruba a organisa un conferencia di salubridad na Aruba na juni 2015 y despues nan juni 2017. Meta tabata pa firma palabracionnan y combenionan pa loke ta trata cooperacion entre e paisnan pa logra un cuido di calidad halto y pagable.
A firma combenionan riba tres area, esta “International Health
Regulations”, cooperacion en general dor di e paisnan hunto cu PAHO y
cooperacion entre inspeccionnan di salud di e paisnan.
Wyatt-Ras ta senjala cu e combenionan aki ta bon ehempel di resultado di IPKO y di gobierno cu ta traha conhuntamente cu Parlamento na interes di nos pueblonan den Reino. Wyatt-Ras ta di opinion cu gobierno di Aruba mester sigui cu e cooperacion y hasta por keda ta e trekker di cooperacion den Reino, manera tabata e caso anteriormente.
Banda di pidi e minister pa manda documentonan cu el a firma a puntra minister si nos como Aruba lo keda fungi como trekker pa loke ta trata e area di salubridad den Reino. Ademas a puntra minister cual ta e diferente palabracionnan cu a ser haci pa loke ta trata prevencion, estilo di bida, movecion y deporte. A puntra tambe pa e acuerdo di cooperacion cu a sera cu e fundacion na Boneiro Mariadal. Tambe a puntra si a palabra cu AZV di Aruba lo traha hunto cu e otro seguronan general na otro paisnan pa loke ta compra central di mendicamento. AZV Aruba cu tin un trayectoria mas largo den Reino tabata habri pa traha hunto.
A puntra alavez ki cursonan lo ser entrama pa profesionalnan den Reino y palabracionnan rond di desasternan y si gobierno por manda cuanto esaki lo costa. Pa loke ta trata e otro palabracionnan ya caba firma, Wyatt-Ras a puntra con ta bai cu ehecucion di loke a ser palabra conhuntamente.
E parlamentario ta spera di por haya contesta ariba su pregunta den bienestar di e area di salubridad cu ta un area cu a mira hopi cambio durante ultimo anjanan cu diferente leynan cu a cambia y diferente palabracionnan importante. Pa futuro cercano ta di importancia pa sigui traha nan diferente cambionan cu lo por genera ingreso pa nos pais manera entre otro e centro oncologico y catheterisacion.
