Segun sra Arends-Reyes por a tuma nota cu Minister di Turismo ta orguyoso di su maneho pa a logra volumen mas grandi di pasahero di crucero. Ta bon pa remarka cu desde 2017 caba tawata pronostica cu e añanan 2018,2019 y 2020 lo ta aña nan stabil cu acuerdonan sera añanan anterior caba pa Aruba lo por ricibi entre 750 mil pa 800 mil pasahero di crucero. Tin varios motibo cu Aruba por yega na e cantidad aki y ta danki na trabounan y inversionan grandi algun aña anterior den awanan di Aruba a pasa manera ‘dredging’ pa hasi e awa mas hundu pa awe Aruba por ricibi barconan mas grandi cu tin capacidad hopi mas grandi di pasahero. Por ehempel den e liña di Royal Caribbean Cruise ta ricibiendo barconan manera Freedom of the seas enbes di Adventure of the seas y pa Carnival lines ta hañando Carnival Horizon y Carnival Freedom. Tambe a percura añanan anterior pa den e ‘low season’ tin mas barco y barconan nobo manera a logra trece e barco di Disney Cruise. Tur esakinan ta contribui na yega na volumenan mas grandi di pasahero pero esey no ta kita cu mester pone hopi atencion pa e pasaheronan aki y nan contribucion yega pa ‘trickle down’ pa e economia di centro di ciudad tambe. Awor mas cu nunca mester bon relacion cu APA, e centro comercialnan y representantenan di centro di ciudad y e conciergenan di hotelnan. Ta pasando demasiado biaha cu e tiendanan ta habri y e turistanan di barco no sa. Mester percura pa e turistanan aki keda yega den nos centro di ciudad tambe. E magno proyecto di Port City si no ehecut’e bon por bira un ‘net’ caminda lo gara e turistanan y tene nan na e localidad aki so y asina competi unfair cu centro di ciudad y e area hotelero. Mester tin di berdad un bon planificacion y maneho pa Port City no bai mata tur otro negoshi den e cercania. Aruba su turismo y crecimento riba crecimento ta bon pero mester ta balansa e mester keda uno placentero pa Aruba y su ciudadanonan. Nos naturalesa incluyendo nos beachnan ta pa nos tur gosa di dj’e. Dia nos ciudadanonan cuminsa experiencia volumen di turismo como algo negativo manera tin biaha caba por tuma nota riba medionan social ta tempo pa ‘grijp’ in y bai over na calidad y no necesariamente na cantidad mirando cu den e 3 pa 5 añanan proximo Caribe lo conose mas di 100 proyecto hotelero nobo cu ta competencia directo pa Aruba. E maneho pa futuro cu decisionan awe lo sigui determina nos exito como destinacion pero tambe como pais pa biba sra Arends-Reyes ta termina bisando.