Parlamentario drs. Mervin Wyatt-Ras ta trece padilanti cu despues di un aña di gobernacion gobierno actual no a logra mucho pa mehora calidad di bida di nos hendenan. Envez di esaki gobierno a ocasiona un crisis financiero, pobresa y crisis social.
Segun Wyatt-Ras e politiconan di MEPPORRED na mando durante cu nan tabata den oposicion a keha hopi y a anuncia cu tin mega debe. Sinembargo ora nan a drenta den gobernacion envez di baha debe cu nan a keha di dje, nan a start sali haciendo un debe di 130 miyon florin. Aki por mira claramente cu esnan den gobierno a gaña esnan cu a sostene nan.
Envez di inverti e 130 miyon den nos hendenan gobierno a skohe pa gasta e placa aki pa cumpra productonan di luho, manera auto y viaha manera Serafina den Jet. Envez cu a hinca e 130 miyon aki den mehora calidad di bida di nos hendenan a hisa gastonan di gobierno cu 125 miyon, di cual 13 miyon ta gastonan di mas personal y 17 miyon ta gastonan di operacion esta di compra di autonan di ultimo modelo y di luho, viahenan lucrativo y fiestanan grandi.
Pa cubri gastonan di gobierno a bin cu medidanan, e.o. subida di BBO te na 6%. Esaki contrario na loke nan a gaña pueblo den campaña. E subida di BBO a haci cu nos pueblo, especialmente esnan cu tin un salario minimo, nos grandinan, esnan cu un handicap, esnan cu ta cobra bijstand, mamanan soltera y hobennan desemplea, tin cu gasta mas placa pa sobrevivi, dor di cual no ta resta nada den nan cartera. Tur producto a subi di prijs, banda di cu tin cu paga mas BBO. Ademas comerciantenan tin mas gasto di produccion locual a hisa prijsnan y a trece cun’e kitamento di personal for di trabou.
Esaki ta contrario na loke esnan cu ta forma e gobierno actual a priminti den campaña cu lo aumenta salario minimo, lo hisa bijstand, lo yuda esnan den necesidad, lo baha edad di pensioen, lo baha prijs di awa /coriente/gasoline y lo crea mas empleo.
Al contrario e gobierno aki a causa pobresa, hasta serca esnan cu ta traha, mientras nan no a cumpli cu nan promesa na pueblo, ni ta dispuesto den corta den nan mesun gastonan y baha e cantidad di minister.
Ademas e gobierno aki a bira experto den persecucion politico tanto di trahadornan , hefenan di departamento y hasta prensa cu nan no gusta.
No ta nada straño cu e gobierno aki a core anuncia cu tin crisis social, pasobra e probresa financiero cu e gobierno aki a causa dor di tur medida y persecucion di trahadornan a hinca nos pueblo berdaderamente den un crisis.
Durante tratamento di presupuesto di 2018 a core presenta un nota di cambio unda a ubica17 miyon florin pa ehecuta un plan pa atende cu e area social. Sin ta pa fraccion di AVP e suma aki lo a bira 9 miyon paso gobierno kier a baha e suma aki cu mas o menos 6 miyon. E crisisplan cu gobierno a presenta ta netamente un follow-up di tur loke tabata ser haci caba den gobiernacion anterior. Locual ta logico tambe paso ta profesionalnan a y ta trahando den e area social. Pero e minister encarga cu Asuntonan Social kier haci comosifuera ta dia el a bira minister Asuntonan Social y sector social na Aruba a cuminsa existi. Ta manera cu e ta “vind de wiel uit” y ta awor ta bai soluciona problemanan social. Wyatt-Ras ta decepciona cu ni te ainda e no a presenta un ley pa regla e fondo social na Parlamento. El a manda un carta Parlamento tocante e fondo y Staten a manda su gevoelens pa cu e fondo. Esaki no ta un base legal pa e fondo. Asina e minister aki por uza e placa destina pa sector social den tur otro sector of ministerio of proyecto sin cu Parlamento por controla esaki manera cu mester ta.
Wyatt-Ras a keda sorpresa ora ela tende den un conferencia di prensa cu e lista di espera di asuntonan social di 2 luna a crece pa 2 anja. Wyatt-Ras ta puntra su mes con esaki por ta? Ta parse cu e minister cu a logra haya placa pa 2 anja a aumenta e temporada di e lista di espera igual cu e cantidad di anja cu e tin pa gasta e placa.
En todo caso por lo general den e aña cu a pasa tur proyecto cu a ser ehecuta ta proyectonan di gobierno anterior, manera e.o. finalisa proyecto di Green Corridor, Watty Vos Boulevard, Renovacion di Hospital, Centro Multifuncional (MFA) na Sta. Cruz, proyecto di oncologia na Imsan, proyecto di SDG’s y proyectonan den area cultural cu ya caba tabata andando.
Parlamentario Wyatt-Ras ta spera cu despues di e un aña aki gobierno aki cuminisa presenta y ehecuta proyectonan di su mes y cuminsa pone e hende central den su maneho pa mehora calidad di bida di nos hendenan, manera gobierno anterior a bin ta haci. Gobierno anterior a hisa salario minimo, a hisa bijstand, a hisa pensioen, a introduci y hisa reparatietoeslag, a duna mayornan schoolkinderentoeslag y a renoba diferente skol y barionan y nan infrastructura. Banda di esey tabatin diferente proyectonan pa hubentud cu ainda ta continuando.
E gobierno aki mester stop di papia y keha y mester cuminsa traha di berdad pa garantisa desaroyo, especialmente pa esnan mas vulnerable den nos comunidad.
Durante tratamento di preupuesto di anja 2018 na mei 2018 a presenta un plan y aloca un suma di 17miyon pa atende cu crisis social sin embargo te ainda ni foe ni fa di ehecucion di e plan. Esey kiermeen cu e crisis ta nan a fabrik’e. Pues por conclui cu despues di un aña di gobernacion gobierno a ocasiona probresa y crisis tanto finaciero como social.
