Parlamentario Mervin Wyatt-Ras durante tratamento di presupuesto di Asunto Social y Justicia a cuestiona gobierno riba pa loke ta trata uso di suma di 36 miyon florin pa social crisisplan, sin e efecto desea. Segun Wyatt-Ras por tuma nota cu e wachtlijsten cu gobierno a priminti di baha te ainda ta existi, no a bin un registracion debido di casonan pa garantisa cu tin bista riba e clientenan cu ta meldo na buro Sostenemi cu segun ley di Codigo Civil ta e meldpunt pa casonan di abuso y maltrato di hoben. Enbes di mehora registracion aki di e casonan awor kier bai over na registracion central na DVG. Tampoco no a mehora e cooperacion entre instancianan na un forma optimo pa haci referencia mas eficiente y pa evita cu famianan di victimanan ta ser manda di cashi pa muraya prome cu nan haya yudansa. Ta bai introduci un otro entidad, un Family Justice center pa mehora cooperacion entre instancianan. Aki no ta dirigi riba mucha y hoben so pero riba victima en general. E forma aki ta pa agilisa proceduranan juridico y pa haya prueba, sinembargo no lo zorg pa guia di e victimanan. Ta keda cu e ayudo concreto na victimanan despues di abuso y maltrato apesar di inversion di sumanan cuantoso ta keda atras.
Segun e minister actual cu a caba di tuma e cartera over tur cos ta bon. No tin niun wachtlijst paso nan a ser weggewerkt, mientras nos cuidadanonan no ta haya yudansa mesora y tin cu warda. Tambe e ta di opinion cu e cifra di criminalidad den nos pais ta stabiel. Esaki apesar cu tur dia prensa ta notifica casonan hasta hororoso di asesinato hasta dor di hobennan cu ta aumentando.
Wyatt-Ras ta di opinion cu banda di yudansa na personanan den comunidad ta di sumo importancia pa inverti den prevencion. Gobierno di AVP semper a atende cu prevencion y a crea facilidadnan preventivo. Paso preveni ta mihor cu cu lamenta. Wyatt-Ras ta di opinion cu banda di skol, deporte, formacion social,programanan di informacion, entretenimento di hobennan, e centronan di cuido pa mucha, esta crechenan y tambe Trai Merdianan tin un rol importante den prevencion di problemanan di hubentud. Nan ta e randvoorwaarden of condicionnan cu ta sostene educacion di mucha.
Un mayor cu ta traha of tin retonan cu educacion di su yui ta haya sosten for di e centronan aki cu ta atende cu mucha y hoben. Pesey ta di vital importancia pa equipa e centronan aki pa haci nan funcional y di calidad pa atende cu retonan di nos muchanan. Sinembargo den e gobernacion di MEP, POR y RED e minister encarga cu ensenjansa a masacra Trai Merdia. A kita tanchinan y tambe kier a corta den ensenjansa.
Pa loke ta trata centronan di cuido di muchanan di 0-4 anja, crechenan, e minister tampoco no a implementa e ley di creche cu a ser aproba na un forma unanime dor di parlamento dia 5 di juni di 2017. E ley aki ta andando desde anja 2001 cu parlamentarionan hunto cu sra. Noris van Lis a mira necesidad pa bin cu iniciativa pa un ley pa reglementa crechenan. Despues di anajanan e ley a ser cambia y atrobe presenta na Parlamento dor di minister Michelle Hooyboer-Winklaar. Fraccion di AVP a duna su aporte tambe riba e “Kwaliteitseisen” pa por implementa e ley, sinembargo e gobierno cu a sigui no a implementa e ley. Awendia lo mester tabatin un inspector special pa centronan di cuido pa tene bista riba funcionamento y calidad di cuido. Despues di eleccion nada no a ser haci cu implementation di e ley importante aki. Por bisa cu entre 2018-2019 a coloca crechenan for di e cartera di ensenjansa bou e cartera di asuntonan social. Apesar di e cambio aki e ley te ainda no por ser implementa. En especial implementacion a bira urgente en bista di incidentenan na crechenan y recientemente tambe un baby hopi chikito a fayece den creche. Esaki a lanta hopi emocion, no solamente di mayornan y famia pero tambe di profesionalnan y henter comunidad.
Ta urgente cu e ley cu desde 2001 a ser trata den parlamento di Aruba y despues adapta na exigencianan moderno y atrobe aproba unaninamente dor di parlamento na anja 2017 ainda por ser ehecuta.
En bista di importancia di educacion di 0-4 anja y hecho cu tin un cantidad di famia cu no lo por manda nan yiu un speelschool fraccion di AVP a propone un mocion pa den 3 luna presenta na Parlamento resultado di un estudio di cofinanciamento di e costonan di creche den cual ta tene cuenta cu capacidad financiero di e mayornan, e distancia di cas pa un creche di calidad y e disponibilidad di transporte di famia.
Tambe pa garantisa cu ora directornanan y leidsternan finalisa un estudio como condicion pa haya y mantene un vergunning segun ley pa maneha un centro di cuido ta ser reconoci.
Na momento cu esaki ta in place mester por bira posibel pa e ley por bin na vigor.
Wyatt-Ras, su coleganan di fraccion y oposicion cu tambe ta cofirmante a keda sumamente desapunta y decepciona di e miembronan di parlamento di MEP y RAIZ cu ta defende gobierno no tabata dispuesto pa sostene mocion aki. Apesar cu tin mucha cu a perde bida paso cos no ta bon regla no ta pone man na curason pa sostene un mocion cu no ta di un partido ni di un fraccion of oposicion so sino di henter comunidad.
