Fraccionnan ta sostene gabinete Wever Croes simplemente no kier mira e realidad di e situacion economic-financiero cu nan gobierno a guia e pais aki aden y na luga di pidi gobierno splicacion riba cifranan preocupante cu tanto Banco Central como CBS a publica recientemente den nan rapportnan.
Lider di fraccion di AVP, sr Marlon Sneek ta mustra cu principalmente miembronan di fraccion di MEP mester saca nan cabes for di den tera y lanta para como respresentantenan di pueblo, exigiendo gobierno duna claridad riba e desaroyonan aki cu no ta mucho alentador.
“Nos a spera cu e fraccion mas grandi cu ta sostene gobierno, lo a pidi splicacion na nan gobierno riba e situacion economico cu tin na e momentonan aki dor di Banco Central, cual preocupacion a wordo confirma cu e rapport tambe di CBS.
Sinembargo na luga di cumpli cu nan responsabilidad y defende interes di pueblo, nos por mira un fraccion di MEP determina na pone nan gobierno mustra bon den un situacion negativo na luga di atende interes di pueblo cu ta nan responsabilidad.
Nos a kere cu e grupo nobo aki di MEP, c’un otro mentalidad, cu ta bin papia di cosnan positivo, cu di berdad ta bay lesa nan rapportnan, cu di berdad ta bay cuestiona gobierno.
Awor na luga di cuestiona gobierno, nan ta cuestiona oposicion, loke ta un hilaridad, ya cu ora cu pueblo a kere cu nan a vota pa nan pa nan ta para eynan pa defende pueblo su interesnan, nan no tey pa defende interes di pueblo, nan tey pa defende gobierno. Tur loke oposicion bisa, nan kier bisa algo contra.
Loke a sali den e rapport di Banco Central, ta bisa bon cla cu: ‘during the second quarter 2018, survey business indicates, a decline in investment, as the percentage of surveyed firms indicatesm worsening,’ e ta birando pio.
No ta AVP ta bisa esey, ta un rapport di Banco Central y cu ta sigui bisa: ‘investment conditions grew by 9.9% point, from 8% in the first quarter of 2018 to 17.9% in the quarter during review’ y ta esey ta loke nos a trece dilanti.
E prome tabel di 0 pa 20, e prome kwartaal e 9.9% cu nan ta papia di dje y di dos kwartaal 17.9%, cifranan di Banco Central hinca den un tabel y awe MEP kier traha un ‘factcheck’ cu e cos aki no ta existi.
Ta un tristesa ora cu e parlmentarionan aki di MEP, ta hinca cabes den tera, anto no kier reconoce e realidad cu nos ta bibando aden.
Conclusion di Banco Central: ‘the business procession survey indicates the degree of confidence among the serveyed business , decline during the second quarter of 2018. This sentiment is expected to continue in short term future.’
Pues e rapport ta bisa bon cla cu e confiansa di e sector, no ta kere den e negoshi cu ta tumando luga na Aruba, no ta kere den futuro tampoco cu haci negoshi lo bira miho na Aruba.
Esey ta loke fraccion di MEP mester bay cuestiona su gobierno riba dje, con bin despues di a haya un pais, ya cu nos ta ripara cu nan ta purba di papia di factcheck, cana bay te den 2014 pero nos ta den 2018.
Na 2014 gabinete Mike Eman II a atende cu e situacion financiero y a duna gabinete Wever Croes un pais floreciente, a duna boso un pais cu tabatin negoshinan ta lanta tur dia, un pais cu economia tabata draai.
Awe nos ta haya unh realidad cu despues di un aña, mira kico boso a haci cu e pais. Na 2014 nos a atende cu e situacion di e tempo ey y e rapport ta mustra con cla e situacion na 2017 pero den un aña di tempo mira kico a pasa.
Ya e pais ta na werki y no ta algo cu Marlon Sneek of AVP ta bisa pero e realidad tur hende por mira, y bay cana na San Nicolas, bay cana den Caya Grandi, puntra comerciantenan, sali for di e hol, sali for di e cocolishi anto bay bishita hende, anto boso lo tende kico ta biba den pueblo.
Sali for di cocolishi y bay entiero y boso lo haya sa kico e pais aki ta bibando aden, pasobra esey ta e realidad.
Boso den boso cocolishi tur cos ta bon, pa boso bida ta lekker, pero e realidad di e pueblo aki no t’asina ya cu e presion di boso maneho di medida, ta chocando pueblo y comercio, ta cabando cu negoshi y economia.
No ta cifranan di Marlon Sneek, pero cifranan di CBS, subi website di CBS y boso lo haya nan,” Parlamentario Marlon Sneek a declara.
