Recientemente sra Arends-Reyes a atende e Cruise Symposium Aruba 2018 caminda cu diferente cifras, proyecionan y metanan a ser presenta. E industria di crucero ta celebrando su 60 aña di existencia y pa e motibo aki e Cruise Symposium tawatin un ocasion special pa celebra un momento historico y bunita pa e industria turistico. Remarcabel tawata e ausencia di e Minister di Turismo na e celebracion di Dia di Turismo y pa e symposio special di crucero celebrando su 60 aña di existencia. Durante e symposio di crucero na aña 2017 a presenta e metanan pa 2018. Locual cu tawata pronostica pa 2018 tawata cu e cantidad di pasaheronan lo surpasa 800 mil pero pa motibo di cancelacionan nos lo por yega serca di 2017 of keda cu un ‘flat growth’. Na aña 2017 e industria di crucero a contribui cu 85.5 miyon US dollar. Pa 2019 ta pronostica un 770 mil pasahero cu ta atrobe den careda di 2017 of menos, cu 314 calls cu ta un poco menos pa motibo di barconan mas grandi. Barconan mas grandi ta algo cu ta birando un trend mundial caminda Aruba a cuminsa prepara basta tempo pasa pa ricibi e tipo di barconan aki cu por carga alrededor di 4 mil pasahero, tipo Carnival Horizon door di por ehempel percura pa nos haf ta hundu suficiente door di uzo di ‘dredging’. Treciendo barconan grandi tin su ventaha pero sigur su desventaha tambe den caso cu un barco grandi cancela ta 4 mil pasahero por cai afor den un solo biaha. Den un resultado di investigacion nobo tin un incremento di 9% di e on- island spending cu tawata na 112 usd. Aruba su comercio por perde pa gana casi un miyon florin den un solo biaha den caso di cancelacion di un barco grandi asina. Tambe un otro reto ta keda e congestion di personanan y trafico den e area y tambe e uso di beachnan popular dor di gruponan grandi di turistanan di crucero. E tema di uso di beach nan popular na cierto momento y e congestion a pensa ariba drecha e beach completo na Bushiri hotel pa asina por haña mas beach tanto pa local, turista como turista crucero cu tin demanda pa uzo di nos beachnan. Awor cu e posible desaroyo di St Regis na Palm Beach a comprende cu den e MOU ta papia di kita tur palapa actual, post policial y asina por imagina cu e hotel lo kier exihi su mesun typo di cabananan pa su huespednan cu e efecto cu por hasi’e menos atractivo pa localnan hasi uzo di e area aki cu mesun frecuencia cu awor sra Arends-Reyes ta termina bisando.