Ora cu fraccion di AVP ta papia di e “bestaandsminimum” di comunidad, no ta papia di cifranan cu partido AVP a inventa pero di cifranan official publica pa CBS, esta Centraal Bureau Statistieken, lider di fraccion di AVP, marlon Sneek a trece dilanti.
“Ora cu nos papia di cifral di ‘bestaandsminimum’ nos no ta papia di cifranan cu ta cay for di shelo pero ta cifranan cu ta wordo publica pa CBS y tur hende por subi cbs.aw pa haya e documentonan total y real pa mira e analisis cu ta wordo haci relaciona cu poder di compra di nos ciudadanonan.
Loke por mira cu dia cu e gobierno actual a drenta den gobernacion na 2017 y si tuma un comparacion di e periodo di augustus 2017 y e periodo di augustus 2019, tur hende por mira pa loke ta e ‘bestaandsminimum,’ CBS ta mustra lo siguiente:
Pa un famia di cuater persona consistiendo di un mama y tata y dos yiu di entre 0 pa 14 aña, na 2017 e famia ey tabatin mester di un suma di 4306 florin pa nan por a sali dilanti.
Semper tabatin e discusion con nos ta hisa esaki pa motibo cu si ta trata di un famia caminda dos hende ta cobra un salario di minimumloon, lo no yega e suma aki y semper e discusion tabata con ta drecha e poder di compra aki.
Nos ta mira cu tur fin di aña y comienso di aña salario minimo ta subi y ainda e falta pa haya su atencion pero loke si nos tin cu para keto riba dje un rato, e hecho cu awe augustus 2019, cifranan di CBS, no di Marlon Sneek, tur hende por subi www.cbs.aw y por haya esaki, ta mustra c’un famia di dos mayor y nan dos yiunan, mester di un suma di 4981 florin pa nan por biba.
Nos ta papiando comparando esaki cu na momento cu e gabinete Wever Croes a drenta gobernacion, por mira un diferencia di 675 florin mas e famia ey tin mester pa por biba.
Ora cu nos mira por ehempel e puntonan cu CBS ta tuma den consideracion pa haci e berekening aki, por mira cu na 2017, cuminda cu ta e aspecto basico y mas importante, tabata na 0.9% di inflacion, pues e no tabata ni na 1% e tempo ey.
Ora cu nos mira awe na 2019, cifranan di CBS, nos ta mira cu cuminda tin un inflacion di 12.4% cu ta un e aspectonan principal d cada famia y por mira diferente punto cu nan a usa den nan analisis, caminda nan a usa tambe transporte publico of transporte den su totalidad, esaki a subi cu 18% mas halto cu 2017.
Pues e efectonan di maneho di gabinete Wever Croes, ora cu nan a tuma decision pa redobla BBO, aumenta accijnsnan, esaki tin un efecto colateral pa e famia pa motibo cu tur hende sa cu comercio ta pone e aumentonan aki den nan su prijsnan y automaticamente esunnan cu ta bay cumpra, ta haya nan mes ta bay paga mas pa e cos cu pueblo tabata cumpra ayera.
Ta bon pa pone enfasis un biaha mas, cu riba cbs.aw por mira cu loke nos ta trece dilanti na e momentonan aki, ta cifranan veridico, no ta cifranan cu nos ta inventa pero ta cifranan cu CBS ta publica y ta cifranan cu nos ta usa.
Antes cifranan no tabata existi pero awe tin cifra pasobra cu gobierno anterior a percura pa pone departamentonan ‘up to par’ caminda nan por produci cifra y awe niun hende no por gaña ningun hende mas.
CBS su cifranan ta confirma cu inflacion riba cuminda na augustus 2019, ta 12.4% y un famia mester di un suma di 675b florin mas pa nan por biba manera cu nan tabata biba na 2017 ora cu gobierno di MEP a drenta den gobernacion.
Ta importante pa fraccion di AVP trece esaki dilanti pasobra cada bes gobierno actual kier papia di gobierno anterior y no ta asumi su responsabilidad y awe nos por mira cu gobierno anterior a laga un inflacion riba cuminda di 0.9% y awe e inflacion ey ta 12.4%.
E no ta di gobierno anterior, e ta consecuencia di maneho di gabinete Wever Croes ya cu ta di dje e maneho ey ta y ta di dje e cifranan di awe ta.
Gobierno mester asumi su responsabilidad y stop di wak den spiel y wak patras pero wak den e windshield y cuminsa goberna e pais aki y stop di sconde tras di gritonan di ma hereda,” lider di fraccion di AVP, Marlon Sneek a declara.
