No tin duda cu e cumbre organisa pa partido di pueblo Arubano AVP tabata sumamente exitoso. Cu un asistencia masal, participantenan a confirma nan compromiso cu partido y cu Aruba. “Esaki tabata e meta di e cumbre,” asina Sr. Richard Arends, ex-minister y actual miembro di fraccion di AVP den Parlamento a declara.
“Banda di fortalese e spirito di ekipo a fiha e agenda politico y institucional di partido.” E sala tabata yen di simpatisadornan, sostenedornan, activistanan, como tambe personanan cu no a sostene AVP durante e ultimo contienda electoral pero e sinti nan mes yama pa participa.
Durante su discurso Parlamentario Sr. Richard Arends la subraya e importancia di preparacion di un partido na momento di asumi un responsabilidad sea pa dirigi e Pais, of pa forma parti di oposicion. E mes como Presidente di FESCA – cu awe ta carga e nomber di Fundacion Dr. Mito Croes pa Estudionan Social Cristian – a presenta e estudionan riba economia di Aruba cu a sirbi como base di e maneho di e utimo gabinetenan bou signatura di AVP.
E tempo ey e estudionan a conclui cu bo no por tin un economia sostenible si bo actividadnan economico no tin un balor agrega, bo infrastructura no por sostene e actividadnan economico cu bo ta desea y bo calidad di biba ta keda atras.
Como consehero, hefe di gabinete, minister y awor parlamentario, Sr. Arends ta conta cu esaki tabata e mantra di e gobernacionan bou signatura di AVP y a forma liña “berde” den nan vision, nan maneho y nan decisionan.
“E principionan di partido AVP ta basa riba e cuatro pilarnan cristian-democrata: solidaridad, sostenibilidad, husticia social y responsabilidad comparti. AVP a sa di keda mantene su mes na e cuatro fundamentonan aki den cualkier rol cu nos a asumi of responsabilidad cu nos ta carga.”
Sr. Arends cu a traha hopi serca di Sr. Mike Eman y tabata testigo con e mesun persona aki por yega na esunan mas necesita, como tambe sera aliansanan strategico na nivel internacional.
“Sr Eman ta un estadista, visionario y indudablemente lider di partido AVP,” Sr. Arends a finalisa bisando. “Awe nos tur a demostre nos compromiso y cu nos ta forma un ekipo fuerte pa sostene den su trabownan”
