Miembro di Parlamento pa partido AVP, Michael Lampe, a expresa su preocupacion relaciona cu binmento di un otro proyecto hotelero. Lampe a accentua cu ta hopi importante pa corda cu como pais bo mester tin bo identidad y cultura cu ta balornan grandi, no solamente pa nos, pero pa e turistanan tambe. Nos bishitantenan ta en busca di e experiencia cultural aki cu nos mester tene na cuenta. Nan kier conoce mas di e Isla, mas di e cultura y e autenticidad cu nos tin pa ofrece.
Solucion no ta pa bin cu mas hotel grandi! Na momento di anuncia un proyecto di hotel all inclusive asina aki, e Minister di Infrastructura mester tene na cuenta e area asina importante di naturalesa cu eta bay na inversionistanan internacional. Minister Otmar Oduber mester por sa cu e mester respeta medio ambiente, pensando con pa desaroya esaki, enbes di djis yega haci locual e kier pa asina facilita un hotel mas riba nos isla.
Ta importante pa sinta y brinda San Nicolas e ayudo di por desaroya su mes, reteniendo su identidad. Teniendo e comunidad na cuenta y su experiencia cultural rico cu nan ta posee. San Nicolas ta un area di gran beyesa, un diamante den locual ta identidad y cultura. “Nos no mester comete e eror di desaroya cantidad grandi di hotel causando daño na medio ambiente y mas ainda un efecto negativo na e experiencia cultural di nos isla”, di acuerdo cu Parlamentario Lampe.
Na final e miembro di Parlamento a cuestiona si enberdad e solucion sostenibel ta pa bin cu mas hotel. Ta hopi ta esunnan preocupa y esey ta conta pa partido AVP tambe, e parti medio ambiente sigur tumando na cuenta tur e desaroyonan anterior pa locual ta trata e sector hotelero como tambe e areanan caimnda nan ta situa.
No por keda sin menciona tambe cu Centrale Bank a indica cu turismo ta stagna, yegando un punto cu lo no bay na un siguiente nivel mas. Mas hotel no necesariamente kiermen mas turista y esey ta bisto. “San Nicolas mester di stimulacion economico y mas cu claro nos ta sostene esaki pero den pensamento diferente con pa yega miho na esaki”, asina e miembro di Parlamento a termina bisando.
FIN
