“ODCA, e organisacion cu ta conta cu 27 partido miembro, represenatondo 23 Pais den Centro, Sur America y Caribe ta un factor sumamente importante pa fomenta y fortalece e valornan riba cual partidonan Social Cristian, cu enfoke humanista ta recohe nan ideolgia y vision pa futuro. Pa e motibo aki mi a sinti mi mes bendiciona y honra di por a representa Partido AVP na e di 23 Congreso Statutario di ODCA na Mexico”, tabata palabranan di Clifford Heyliger riba su particpacion na e congreso importante aki. Recientemente Clifford Heyliger a worde nombra tambe den e directiva nobo di AVP y encarga cu temanan di relacionan internacional. Esaki tabata su promer mision representando AVP y Aruba internacionalmente.
“Mi a drenta politica, pasobra di mi fe, mi creyencia cu ta fortifica mi conviccion cu sirbicio publico mester worde compaña cu un mision humano trancendental. Nos caminda padilanti mester ta ancra fuertemente den valornan profundo. Amor prohimo mester ta nos guia continuo, e marco di referencia pa nos duna contenido y busca e bon comun pa nos Pais y sociedad. Den ODCA ta contempla y profundisa continuamente e temanan aki y pesey mi a sinti e valor grandi di a haya e oportunidad pa a representa AVP na e congreso aki, Clifford Heyliger a subraya.
E honor aki a haya un dimension mas lokal y serca na momento cu mi por tabata parti di e votacion na e Congreso cu a eligi nos lider di partido, Mike Eman como Vice-Presidente di e instituto aki hunto cu un Presidente nobo den calidad di Mariana Gómez del Campo Gurza (Partido Acción Nacional, México). Un reconocimento importante pa Aruba, AVP y Mike Eman cu promer tabata Vice-Presidente pa e area di Caribe y awor a bira un di e Vice-Presidentenan di henter e organisacion.
Clifford Heyliger ta splica cu temanan di e congreso tabata varia pero a enfoca principalmente riba e principionan Cristian Democrata cu ta solidaridad, responsabilidad comparti, equidad publico y nos responsabildad pa e futuro. Hopi pais ta sufriendo pa falta di liderazgo cu vision y un guia transcendental. E concepto di amor prohimo y e buskeda di e bon comun ta bai perdi den Paisnan caminda e gobernacionan no ta mira mas e nececidad di Pueblo pero unicamente kier busca y mantene poder den un forma totalitario pa previlegia un grupo selecto, mientras e pueblo ta sufri.
Un vez mas den ODCA nos a reafirma nos compromiso pa ofrece nos pueblonan den nos Paisnan e caminda di bon comun, sea den nos gobernacionan of den opcion alternativa pa gobernacionan cu ta riba e mal caminda.
Clifford Heyliger ta subraya cu amor prohimo ta pone cu bo ta mira, scucha y sinti bo mes como politico un cu e nececidanan den pueblo, nan ta bo rumannan. E ta pone cu bo ta realisa cu gobernacion no ta pa bo partidarionan pero pa tur bo rumanan. E ta pone cu bo ta realisa cu bo ta un jiu di esnan cu a bai bo dilanti. Cu respet y gratitud pa nan sacrificio, cu conocemento di nan valornan bo ta biba den e presente y bataya hunto cu bo rumanan pa un presente y futuro prometedor. Realisando cada vez tambe cu bo ta un ruman grandi pa esnan cu mester bin ainda. “You are your borthers keeper” Clifford ta envatisa. Asina, mientras bo ta esforza bo mes cu valornan humanista pa haci e presente mihor bo ta habri caminda pa e futuro.
Unicamente cu un strea di guia bo por ta para asina den e presente, conectando pasado cu futuro y futuro cu pasado. E buskeda di e bo comun ta e kompas. Den ODCA, Clifford Heyliger ta splica ta e temanan aki di nos responsabilidad nos a reflecciona riba dje y a subraya e caminda padilanti. Locual nos ta haci tambe den AVP.
Clifford Heyliger a splica tambe cu den e conferencia anterior na Costa Rica den cual Mike Eman y Robert Candelaria a representa AVP a keda acorda un resolucion pa AVP tuma e iniciativa pa establece na Aruba un Centro di Formacion Politico pa region. E concepto aki ya AVP ta desaroyando hunto cu Rycond Santo do Nascimento den Fundacion Digna Lacle Herrera. Awor cu COVID a pasa por bai dune e conido internacional y regional manera acorda cu ODCA.
“Mi a bin bek cu hopi animo pa sigui lucha y sigur hopi inspira pa a mira e admiracion cu tin pa partido AVP y nos lider Mike Eman cu a haya hopi elogio di e Presidente saliente Juan Carlos Latorre y esun entrante. Ambos a expresa nan admiracion pa e calidanan humano di nos lider y visonan desplega den liderazgo na Aruba y contento cu e lo ta den e team nobo di ODCA”. un Clifford Heyliger hopi satisfecho cu su participacion na ODCA a termina expresando.
