Dos siman pasa a cuminsa un reunion publico riba e ‘kwartaal rapportage’ caminda na momento cu e reunion a cuminsa, fraccion di AVP a mustra cu falta rapport di CFT y diahuebs ultimo Parlamento a haya e rapport.
Lider di fraccion di AVP, sr Marlon Sneek a mustra cu conclusionnan di CFT tabata manera cu fraccion di AVP a bin ta bisando, caminda por a mira un reunion di show, un reunion cu a caba cu cuater Minister presente den sala di e ocho ministernan.
“Entre otro Xiomara Ruiz Maduro, kende ta e minister di finansa, kende su presencia tabata di vital importancia ya cu ta kwartaal rapportage ta wordo atendi, Minister Ruiz Maduro no tabata na Aruba.
Minister Glenbert Croes kende ta un di discusionnan cu tin cu si e fondo di e Sociaal Crisis Plan ta sigui si of no, ya cu a mira cu tin un tendencia cu ta tumando cantidad di hende na trabou den e plan aki pero no ta atendiendo realmente cu e situacion dificil di e hendenan, anto e minister aki tampoco tabata presente na e reunion, ya cu e tabata na Hulanda.
Minister di Turismo, Dangui Oduber tampoco tabata presente, Minister Chris Romero tampoco a asisti na e reunion aki, loke ta lanta e pregunta ta cua rapportage tabata tratando.
Ken a rapporta si e ministernan mes cu mester a duna cuenta no tabata den e reunion y fraccion di AVP a mustra bon cla cu aki ta trata di un show nada mas locual a wordo confirma tambe ora cu a mira cu no tabatin e ministernan presente cu por a duna informacion real di kico tin na cifra y kico no tin na cifra.
Awe cu nos tin e bista real despues cu CFT a duna su advies, nos por mira cu e cifranan cu mester a atende cune pa loke ta personal, gobierno no a atende cu esaki y CFT a bolbe mustra cu nan ta mira cu e suma di 479 miyon lo bay sigui crece pa motibo cu gobierno no a tuma ningun paso pa frena esaki.
Tambe CFT ta trece e mesun preocpacion cu nos tabatin caminda por mira cu e sociale crisisplan tanto personal como gastonan mester bin bek den e presupuesto di pais Aruba, ya cu no tin un bista real riba dje, sigur ora cu nos mira e rapportage, e mesun rapportage di e Minister concerni ta mustra cu e no a logra nada.
No ta Marlon Sneek, ta e rapportage cu a duna Parlamento y e documento aki ta publico y tur hende por haya esaki, ta mustra bon cla cu practicamente casi tur cos tta den cora y por conclui cu gobierno no a logra ni su meta.
Ta un tristesa caminda tambe ta papia di AZV cu lo bay conoce un deficit e aña aki, pues tin cu bay tene cuenta di un sima di 12.4 miyon extra pa loke ta AZV, CFT ta remarca y pone acento na e ‘sugartax’ den su presupuesto y a tene cuenta cu 16.7 miyon lo a drenta pa e sugartax pero esaki no a wordo implementa.
Pues tin otro buraco di 16.7 miyon florin cu gobierno tin cu bay mira con e ta atende cu esaki y a trece dilanti tambe cu e loonbelasting gobierno ta coriendo atras cu tin 20% menos di loke a wordo presupuesta cu a drenta, na mes momento ta papia di dividendonan di RdA.
Manera ta conoci gobierno a usa RdA pa no subi prijs di gasolin pero como gobierno no a baha accijnsen pero laga RdA paga e diferencia caminda esey lo bay refleha bek den e dividendo cu RdA tin cu duna na fin di aña, caminda nan lo no por bay duna e dividendo di 14 miyon manea cu gobierno tabatin premira.
E cosnan aki ta discusionnan cu mester tin, ora cu nos ta papiando di un suma di 40 miyon cu gobierno ta coriendo atras, sin conta e 14 miyon di SVB ya cu gobierno no a presupuesta pa duna tur pensionado e reparatietoeslag y ta na luna di februari na careda Prome Minister a bisa cu tog e lo bay duna pensionadonan e reparatietoeslag ya cu el a ripara cu pueblo a haya sa cu su gobierno a gaña nan y pa no perde cara a core duna e pensionadonan e suma aki.
Pero esey ta otro 14 miyon cu gobierno tin cu bay mira for di unda e ta saca e placa aki pa e por cumpli cu e presupuesto di 2019.
Esey ta e situacion cu nos tin y no un Minister di Finansa cu ta bin den e prome tanda y informa cu tin un surplus di 0 plus di 60 miyon, pakico gaña comunidad y na momento cu gobierno no por debati cu cifranan real cu tur rapport riba mesa, ta miho gobierno no debati mes.
Ta mentira un show so lo tuma luga y ta manera cu a sosode tambe den intento di gobierno pa tene comunidad contento pero realidad lo Sali tog na cla caminda ya caba nos por mira cu prome di septamber a pasa bay laga nos caba pero gobierno cu semper a grita den pasado cu mester cumpli cu ley di comptabilidad, mes no por cumpli cu esaki,” lider di fraccion di AVP, Marlon Sneek a trece dilanti.
