Den e discucion riba seramento di John Wesley College tin algun punto di maneho di scol cu mester tene cuenta cun’e tur rond di Aruba. Pasobra si tin un cos cu ta sigur: John Wesley College no lo ta e unico scol cu lo por bay wordo confronta cu seramento, a menos cu bin un cambio di gobierno y un maneho cu tin como unico meta pa percura pa awor y den futuro tur mucha y hoben tin acceso sigur na enseñansa di calidad! Ban tene esaki como meta semper!

REALIDAD

E cantidad di alumno cu ta bay scol ta subi y baha. Den caso di John Wesley College ta menciona e reduccion di e cantidad di alumno como unico motibo pakico ta sera e scol. E realidad ta cu no ta na John Wesley College so e cantidad di alumno a baha. Tin mas scol rond di Aruba caminda e cantidad di alumno a baha. Tin scolnan basico cu a sera un of mas clas di e scol. Di e seis clasnan di 1 te cu 6, a sera por ehempel e clas number 3 of 4 pasobra no tin suficiente alumno. Esaki por ta un motibo pa un major cu tin jiu den clas 2 pa pensa cu lo ta miho pa busca un otro scol cu tin tur seis clas, pa no tin cu cambia e mucha di un scol pa otro despues. Si e desaroyo aki sigui y si sigui usa e cantidad di alumno como unico motibo pa sera un scol, anto pronto mas scol lo sera y mas maestro di scol lo mester busca otro trabou. 

SCHOOLGELD

Nos sa cu e reduccion den cantidad di mucha cu ta inscribi na scol no ta para riba su mes. Nos sa cu e costo di manda un mucha scol a bira hopi halto y cu hopi major tin cu casi haci magia pa paga tur e gastonan. E aumento di e placa pa admision na scol (“schoolgeld”) ta un di e costonan cu a y ta sigui subi hopi. Si a cuminsa cu cobra majornan 50 y 75 florin pa cada mucha wordo inscribi na un scol, awor ta cobra 300 y 350 florin pa mucha na scolnan basico. Y entre 350 y 750 na scolnan secundario. Pa scolnan secundario profesional (EPB y EPI) e placa pa inscripcion a pasa 1000 florin! Anto esey ta scolnan publico cu ta cay directamente bou di responsabilidad di gobierno. Colegio Arubano (HAVO y VWO) te awor ta parse di ta esun cu ta cobra mas hopi:1800 florin pa inscripcion. Y ainda tin cu paga pa uniform, transporte, cuminda, cuido na cas y tin hopi biaha pa guia di e mucha den su estudio. (“Huiswerk begeleiding”). Ta mas cu logico cu si un major por haya un scol cu ta cobra menos, e ta scohe pa manda su jiunan na e scol ey. Anto eynan ta surgi un sorto di “competencia” entre scolnan pa haya alumno. No a base di calidad di enseñansa of programa mas atractivo of miho guia. Scolnan ta bay “competi” riba e costo di inscripcion! Sin duda e costo di bay scol tin influencia den seramento di John Wesley College cu ya tabata cobra 350.  

MANEHO DI ENSEÑANSA

Nos ta biba den un pais cu tur mucha y hoben tin derecho riba e mes un enseñansa di calidad, independiente di ken su majornan ta, independiente di nan entrada, religion, sexo of rasa. Nos tin hasta un ley cu ta obliga majornan pa manda nan muchanan menor di edad scol! Pero nos tin un gobierno cu ta para wak aumento di costo barbaro di enseñansa sin haci net net nada pa baha esaki. Si nos tabata tin un gobierno cu di berdad kier pa tur mucha bay scol, e lo a presenta un plan pa maneha e costo cu majornan tin pa nan muchanan bay scol. E lo a busca un solucion creativo pa scolnan den un vecindario caminda e cantidad di alumnonan ta baha of caminda hende ta muda pa bay biba otro caminda. Pero e gobierno aki ta haci net net nada! Pakico por ehempel gobierno no ta uza e situacion di reduccion di e cantidad di alumno pa haci e clasnan mas chikito y tene e scolnan den barionan habr’i?

E situacion aki no ta di John Wesley College so! E seramento di scol no ta un problema cu lo toca scolnan di SPCOA of SKOA so. E por toca scolnan publico tambe. Pesey ta haci un yamada na tur maestro di scol, di tur nivel di nos enseñansa, di scolnan publico, di SPCOA, di SKOA y di tur otro, pa bin sostene e accion pa stop e plan pa sera John Wesley College diahuebs awor 19:00 or dilanti di John Wesley College na San Nicolas. Ban ta solidario cu nos coleganan y ban para pa enseñansa pagabel y di calidad pa tur mucha den tur bario na Aruba! Awe ta John Wesley College, mayan por ta Bo scol!