E persecucion politico di Gabinete Wever Croes a continua den fin di siman caminda varios mama y tata di famia, a ricibi un carta den cual nan ta wordo avisa cu nan servicio ya no ta necesario mas bou di e gobierno nobo cu tin dos luna na mando.
Mientras cu for di momento cu a forma e coalicion MEP-POR-RED, e gobierno nobo a participa cu den e gobernacion aki, e “hende lo ta central” y lo traha duro na eleva e desaroyo social di nos hendenan.
Sinembargo kico por mira despues di dos luna di gobernacion, cu e gobierno nobo aki a tuma tur su prome dos lunanan, pa ehecuta un persecucion politico sin tene na consideracion cu esunnan cu nan ta manda cas, tambe ta forma parti di e vision presenta na pueblo, cu e hende ta central.
No solamente a crea un problema social grandi dor di retira casi 300 trahado di gobierno cu e persecucion aki, e gobierno ta bay over na uza e cuponan aki pa nombra su propio hendenan y hasta den algun sector, aumenta esaki tambe.
Mientras cu Prome Minister ta uza e retironan aki mal informando Parlamentarionan Hulandes cu e ta bahando gasto di personal, e no ta bisa cu ta e retironan aki tabata necesario pa cumpli cu tur esunnan cu nan a priminti un trabou.
E persecucion politico aki ta cuadra cu e vision cu MEP semper a carga como partido politico ya cu na 2001 mesun cos a sosode ora cu cantidad di hende a ser manda cas pa despues no solamente yega e posicionnan aki bek, pero tuma mas hende ainda den servicio y cu a percura pa gastonan halto pa finansa publico.
Na 2009 na momento cu Gabinete Mike Eman I a tuma mando di gobernacion, e prome decision importante cu a wordo tuma, ta di duna esunnan mas debil, esunnan cu entrada abou, haya un espacio pa hala rosea, algo pa cubri gastonan diario cu nan tin y a introduci entre otro e ‘reparatietoeslag.’
A bin acerca placa pa cubri gasto di scol y di buki y a duna esunnan cu ta depende di onderstand, algo extra mesun cos pa nos hendenan grandi, esta e pensionadonan.
Gabinete Wever Croes no a duna nada ainda na pueblo, no a duna ningun señal cu e hende ta central ainda, pero solamente un Minister a haya mas placa riba su presupuesto pa e por maniobra cune.
Ta net e Minister aki hunto cu su gobierno, ta sigui cu e persecucion politico, den un forma asina cruel y traicionero lagando cantidad di famia sin sa con pa sigui cubri nan gastonan diario.
Mientras cu otro grupo a ricibi nan carta di retiro den fin di siman, por a compronde cu ainda tin mas hende cu lo wordo manda cas sin piedad algun.