Diaranson mainta den entrevista cu Parlamentario Arthur Dowers por a haya un poco mas informacion riba e desaroyo pa cu e situacion financiero pero tambe riba e situacion di engaño tumando luga door di e Prome Minister di Pais Aruba Evelyn Wever Croes.

Parlamentario Dowers referiendo na Bestuurs kantoor como “Cololishi Social Club” ta indica cu ta caminda e drama ta tumando luga pa varios luna caba. Un sin fin di engaño den direccion di pueblo como tambe di Hulanda y ta e motibo di pakico nos ta den e situacion cu nos ta aden.

Lo haci denuncia di un carta cu a ricibi diamars caminda e Prome Minister a dirigi na Hulanda y cu Parlamento ta cuestiona ta ki wega e ta hungando cu nan y cu Hulanda.

Prome Minister Croes a bin parlamento diamars pa informa cu e lo ta mandando un carta pa Hulanda y asina pidi permiso pa comparti e 280 pagina y 18 condicion di Hulanda pa locual ta trata e prestamo cu parlamento. Sorprendentemente a tuma nota di algun di e condicionnan aki cu a leak na prensa liga cu partido MEP cu si a haya e informacionnan aki den nan man. Un falta di respet absoluto mirando cu ni parlamento a haya esakinan ainda pa wak.

Locual cu Prome Minister a bisa den parlamento ta cu si e divulga/ duna den inzage e condicionnan aki, e lo por bay cera.

Esaki no ta berdad. No tin niun Gobierno na Hulanda por cera niun Minister na Aruba si e laga Parlamento mira documento. Parlamento ta e organo di mas halto na e Pais aki, y si acaso pidi pa mira un documento, no por nenga nan. Locual a tuma luga ta cu parlamento ( e stempel parlament ) no a exigi pa mira e documentonan aki, mientras cu otro caminda cu si nan a exigi, nan si a haya e documentonan aki ter inzage contrario na Aruba cu no a exigi. 

Un carta manda pa Hulanda pa pidi permiso, un Nonsense!

Den e carti dirigi na Rutte, e ta acusa Hulanda di ta un monster/ criminal cu ta choka nos igual cu e casonan lamentabel di Mitch Henriques y Floyd na Merca ( den felis memoria ) cu ta mencionnan hopi pisa pa usa den un carta, pero ironia cu ta cuminsa e saludo cu “beste Mark” mientras ta continua e carta yamando e pa criminal. Pa finalisa despues di ataka Hulanda den e carta ta termina esaki cu “vriendelijke groeten”. Ta ki wega tin?

Of ta palabracionnan haci entre nan pa laga Aruba kere cu tin algo andando mientras cu palabracionnan ta haci caba. Dowers a haci mencion tambe di a scucha grabacion caminda e Prome Minister ta bisa Hulanda cu si tin kitamento di debe / her financiering anto e ora tin cu haci “damage control na Aruba” y cu ta mustra cu esaki lo ta tumando luga e ora ey.

Laga mustra cu ta rabia, pero na final a bay di acuerdo caba cu e condicionan cu Hulanda a manda, ta local Arthur Dowers ta bisa cu e ta kere ta tumando luga.

Tin cu atende cu Hulanda ariba e aspectonan technic huridico. No scirbi un carta yen di pantomina y largo, tin cu keda zaakelijk y apunta local statuut ta bisa ( di acuerdo / no di acuerdo cu tal puntonan ) y asina nos ta mir’e basa riba ley. No locual por mira den e carta cu a bay, cu ta un berguensa, cu no ta pas den relacion di hendenan serio huridico. E ta un ofensa pa pa Parlamento di Aruba mirando cu ta Parlamento di Aruba mester a haya e informacion mientras ta gaña cu tin cu bay pidi permiso di cual niun caminda ta para den e carta cu a manda.