Segun sra Arends-Reyes e sector di Turismo crucero ta experienciando cancelacionan tras di cancelacionan. Esaki sigur tin su efecto negativo ariba nos Turismo y tiendanan cu ta depende di e barconan. Na April so tawatin un caida di 12% cu ta solamente dos calls, pero dos barco cu ta representa 8000 pasahero cu ta mas cu un miyon dollar na locual cu sa gasta den nos economia a cay afor den un solo biaha pa motibo cu a laga sa cu na Aruba tawatin rafaganan di biento fuerte. Ki nan ta importante pa tuma medidanan pro-activo y investiga di serca si di berdad e rafaganan lo ta asina fuerte cu lo por a afecta e barconan pa por trankilisa e barconan prome cu nan cancela.
E turistanan ta paga pa inclui Aruba den nan itenirario y na momento cu Aruba cai afor cada biaha e por bira algo cu por disgusta nan. Ta berdad cu na 2017 Turismo Crucero a gosa di un aña excepcional of un banner year manera por yame y a yega te na 790000 pasahero, danki na algun barco cu a bin extra tambe pa motibo di horcan. Turismo crucero ta traha cu planning adelanta pues a pone, deal y plania pa aña 2018 cu lo surpasa 800000 pasahero. Tin varios tienda, restaurant, tours y APA mes ta conta ariba e entrada di e turismo crucero aki, hecho ta cu e mester bai over na aumento di locual e turistanan ta gasta na Aruba y no per se cantidad paso manera nos por wak e por fluctua bastante. Pa Mei atrobe Pullmantour a cancela 3 calls pa motibo cu e barconan tin cu bai dry-dock pues mester di mantencion, pues asina atrobe nos ta bai atras cu un 6000 pasahero den un solo biaha den un luna.
Pullmantour ta conosi cu nan turistanan sa gasta na Aruba pues esaki ta un noticia fastioso pa comercio. Na momento cu ta bai e headquarters pa papia cu e lineanan di crucero y hasi e berth reservations mester papia serio cu nan, wak con por keda den contacto estrecho y pa nan por evita cu Aruba keda cai afor di e itenirario. Tambe promove e pakete di incentivo cu Aruba ta ofrece na e lineanan di crucero pa nan hasi mas uzo di dje y sondea wak si mester ahuste den caso cu nan ta surpasa e 7500 pasahero y despues no ta worry pa cancela nos destinacion. Tambe ora cu tin berth reservations di lineanan crucero exclusivo pa nan exihencianan pa Aruba ta den linea cu locual nan ta pidi na otro islanan tambe. Mester keda cu un balanse entre calidad y cantidad y esaki mester traha duro riba dje pa nos Turismo crucero y su contribucion no bai atras sra Arends-Reyes ta termina bisando.
