Partido AVP a aserca e problematica di e negligencia y falta di aprecio pa nos profesionalnan cu ta labora den e sector publico y semi publico, cu a wordo stigmatisa y demonisa pa Gabinete Wever-Croes.
Diasabra ultimo 9 di July 2022 durante e programa radial di partido AVP, lider di partido mr. Mike Eman acompaña pa candidato y profesional den e mundo di enseñansa Otami Thomasia, candidato y hoben jurista Wendrick Cicilia y profesional ariba e area di sostenibilidad y energia renovabel Edelysse Nicolaas a elabora ariba e e negligencia di nos profesionalnan den nos Pais y e consequencianan cu e desaroyo aki por desencadena pa avanse di nos Pais.
Recientemente durante e proceso di tratamento di e concepto di lei cu ta norma e structural salarial ( LNT) di nos profesionalnan, Gabinete Wever-Croes a stigmatisa y denegra nos professionalnan den e sector publico cu ta entrega nan conocemento y expertisia na servicio di nos Pais y nos comunidad. Partido AVP a subraya e necesidad y importancia pa aprecia nos professionalnan, mirando cu e desaroyo, innovacion, modernisacion y prosperidad di nos Pais ta depende di e calidad y conseho di nos profesionalnan.
Den clima di precupacion pa cu e problematica di “Brain Drain”cu Aruba ta enfrentando, e actitud di Gabinete Wever-Croes ta un robes y cuestionabel. Lider di partido mr. Mike Eman a indica cu efecto di “brain drain” lo ta devastador pa nos Pais. Aruba ta un Pais desaroya compara cu otro paisnan den region, esaki ta fruta di e empeño di nos profesionalnan cu ta dirigi y labora na Banco Centraal, SETAR, AHATA, WEB, ELMAR, APFA (pa mentiona algun). E professionalnan aki ta actor principal den contribui na duna contenido na e vision cu Aruba tabata tin pa brinda un miho calidad di bida pa nos cuidadanonan y mejora e producto Aruba.
E profesionalnan den e ambito di enseñansa ta demostiva y demoralisa, esaki Maestra y Candidato Otami Thomasia a confirma y subraya. Maestranan di scol cu mester un entrega fracion di nan salario sin un perspectiva cu lo ricibi esaki bek, y alabes atende cu retonan cu ta wordo ocasiona pa cu ausencia di atentencion y inversion den enseñansa ta dificulta e tareanan di e maestra. Otami Thomasia a articula varios dolor cu ta biba den e mundo di enseñasa y ta condena e falta di vision y interes pa promove cambionan positivo y necesario pa asina eleva e calidad di enseñansa.
Durante e discussion y entrecambio di pensamento locual a resalta ta e conclucion cu Gabinete Wever-Croes no tin un vision cu ta inspira ni motiva nos generacion nobo y nos professionalnan. Wendrick Cicilia a indica cu “sin un vision nos ta perde e oportunidad di inspira un generacion” y a indica cu e precupacion mas amplio di nos hoben profesionalnan ta e ausencia di un vision enfoca riba diversificacion economico cu ta crea oportunidad pa empleo di calidad pa nos profesionalnan local.
Experto ariba e area di sostenibilidad Edelysse Nicolaas ta lamenta cu e gobernante nan actual a bandona e vision di energia renovabel. Aruba di Promer Minister Mike Eman. E tempo ey Aruba tabata un ehempel. Aruba tin tur e recursonan natural pa hasi e transicion pa energia renovabel limpi utilisando solo, biento y demas recursonan manera wave-energie. Cu awe e vision a wordo aborta ta deceptionante pa nos profesionalnan den e area di energia. Un vision cu a crea pa Aruba oportunidad nan nobo, unda partnernan strategico manera TNO y Rocky Mountains instituut a bini Aruba pa asina yuda carga y desaroya e vision di un Pais sostenibel.
Aruba ta enfrenta competencia den Reino hulandes, den region y international. Den mundo unda tur Pais ta ofrece e mihor beneficion nan pa asina atrea talentonan y profesionalnan, nos mester aprecia nos professional nan cu a escohe pa keda contribui of bin bek Aruba pa contribui na nos Pais. Esaki ta e refleho di nan amor pa nos Pais. Partido AVP ta condena e campana di Gabinete Wever-Croes pa asina stigmatisa y demoralisa nos profesionalnan y cuestiona nan amor pa nos Pais. Lider di partido mr. Mike Eman acompaña pa profesionalnan a confirma cu “NOS PROFESIONALNAN MERECE UN TRATO DIGNO PA NAN CONTRIBUCION NA NOS PAIS” .
