Na momento cu scucha Minister di Finansa declara cu rapport di CAFT relaciona cu presupuesto ta positief, esaki ta causa sorpresa tur caminda sigur ora cu tuma nota varios punto cardinal cu e comision di supervision ta señala den su relato.
Lider di fraccion di AVP, sr Marlon Sneek ta mustra cu tin duda grand si CAFT ta di acuerdo cu e cantidad di hende cu gobierno ta tumando den servicio desde cu a tuma mando di gobernacion.
“Ta na su luga pa nos atende Minister di Finansa riba declaracion cu el a duna relaciona cu rapport di CAFT bisando cu e ‘rapport ta positief,’ y remarca aki ta hala atencion ya cu nos ta duda totalmente si CAFT lo por ta di acuerdo cu e cantidad di hende cu gobierno aki ta tumando den servicio.
No mester lubida cu ya caba Raad van Advies a bisa cu tin 100 hende mas den servicio compara cu december 2017 cu februari 2018, pues den un parti di dia gobierno nobo a aumenta gasto di personal cu mas cu 100 hende den apenas algun dia.
Aki nos ta mustra riba e hecho cu minister Dangui Oduber so tin un lista di 16 hende a wordo tuma den servicio y sin menciona e otronan na otro ministerio- y den otro departamentonan di gobierno.
E punto aki ta importante pa nos trece dilanti ya cu durante gobierno di AVP tabatin un ‘personeelstop,’ a introduci e ‘vutregeling’ pa baha e cantidad di ambtenaarnan a cumpli cu rekisitonan pero awe nos por mira cu gobierno ta djodjo y ta pone ‘friends and family’ den gobierno.
Tampoco nos tin cu lubida cu Prome Minister Evelyne Wever Croes a bisa orguyosamente cu el a manda 300 hende cu tabata traha cu Mike Eman cas, pueso no ta solamente 100 hende adicional a bin den servicio di e gobierno aki, pero mas cu 400 hende a wordo tuma den e periodo corto cu el a tuma mando di e pais.
Anto ta net e hendenan aki kier papia di desaster financiero pero ta haci net lo contrario di loke nan mes ta bisa y pueblo tin cu corda cu awe ta bon pa pueblo sa cu mesun gobierno aki ta hinca man den saco di tur ciudadano, ta hisa gasolin cu 16 cen pa medio di accijns adicional, nan ta bolbe hinca man den saco di hende cu aumento di gasolin un biaha mas ora cu BBO drenta na vigor, pa asina nan por paga pa ‘friends and family’ haya trabou.
E cosnan aki a inaceptabel ya cu gobierno tin cu bira serio y mi ta spera cu CAFT ta para banda d pueblo y ta pone ley di LAFT conta pasobra e ley ta papia bon cla kico ta e rekisitonan y kico gobierno tin cu cumpli cu’ne pa su presupuesto wordo aproba.
Ta di lamenta c’un biaha mas medida ta wordo poni riba pueblo dor di MEP pa asina nan por cumpli cu mas di 200 di nan hendenan di nan campaña, di nan campaña, di nan ‘friends and family’ pa duna nan trabou.
Nos lo sigui vigila e desaroyonan aki di cerca y nos lo sigui denuncia tur e tipo di fechorianan aki, cada un di e bagamunderianan aki cu ta tumando luga cu gobierno di coalicion,” Parlamentario Marlon Sneek a declara.
