Parlamentario Richard Arends a referi na e ultimo conseho di CAFT cu a lek durante siman pasa riba cual tabata tin hopi comentario den prensa y medionan di comunicacion social.
“Nos por a lesa den e rapport aki CAFT ta indica enfaticamente, Aruba a sa di cumpli cu normanan manera a wordo prescribi den e Ley di Supervision Financiero, durante e ultimo añana.
Den e conseho por a constata cu e deficit cu e gobierno actual a presenta den nan presupuesto ta ta di -3.9% en bes di +0.5%. E deficit grandi aki y e -3.9% ta inclui no solamente intensificacion y aumento di gasto, pero ta tene cuenta tambe cu e entrada cu lo ricibi pa e supuesto aumento di BBO.
Loke ta hala mas nos atencion ta cu CAFT ta adverti Gobierno di e maneho nobo cu ta wordo hiba y nan ta bisa bon cla pa gobierno revisa e intensificacion y aumento di gastonan pasobra dor di esaki ta aumenta e deficit innecesariamente. A base di esaki nos no por yega na ningun otro conclusion cu si bin un KB, esaki ta a base di propio merito y maneho nobo di e gabinete actual.
Esaki ta confirma e falta di conocemento di e materia pero tambe falta di sinceridad. Finansa publico ta un reto constante y den campaña tabatin solucion pa tur e retonan. E actual titular di finansas tabata den Parlamento y su votadornan lo mester tabata bou impresion cu e la haci su trabou y tabata sa di kico e ta papia. Desafortunadamente e berdad ta mustra totalmente diferente,” Parlamentario Richard Arends a mustra.
Na mes momento sr Arends ta mustra di ta critico riba cu CAFT. Den e conseho CAFT ta recomenda gobierno pa por lo menos pone e deficit na -3.1%, manera e tabata na final di 2017 cu esaki a wordo artificialmente aumenta. Un nivel di deficit cu Aruba a logra alcansa caba entre añanan 2015 y 2016.
“Aunke cu Parlamento no tin ningun informacion di loke ta maneho financiero di e gobierno, e ta bisa si cu si ta presta pa bin c’un deficit di -3,9% en bes di un surplus di 0.5 porciento, nan tin 275 miyon florin extra pa gasta y 3 aña mas pa yega na un presupuesto balansa.
Tanten cu bo no tin surplus, of bo economia no ta crece substancialmente, bo no por papia di un reduccion di debe. Hecho cu tin menasa cu e debe surpasa 90% di GDP ta den man di e Gobierno actual, pasobra e norma stipula pa 2018 lo a nifica un reduccion di debe pa prome biaha den historia.”
Pues aki tin cu enfatisa cu si bin un KB, esaki ta basa explicitamente riba e maneho nobo cu no a cumpli cu e norma di surplus di 0.5% cu mester a wordo logra. Cu no a logra esaki, ta kisas na falta di pro-actividad of falta di conocemento, pero e ta causa caos y incertidumbre den e economia cu dificilmente por wordo recupera.
E falta di pro-actividad ta visibel tambe den e area economico, manera cu ta e caso di refineria, unda Gobierno ta simplemente sinta wak kico ta bay sosode y su mes no ta haci nada, despues cu na 2015 nan mes a presiona Gobierno pa yega na un acuerdo cu CITGO via mocionnan den Parlamento.
E desaroyo di e cinco areanan di inversion paralelo na e obranan infrastructural cu a wordo encarga tambe a yega un paralisis”,” Parlamentario Richard Arends a conclui.
