Partido AVP hunto cu Fundacion Mito Croes y Funadacion Digna Lacle Herrera a tene un ‘brainstorming session’ cu varios sindicato y tambe cu e organisacion di pensionadonan caminda a hiba discusion  riba varios punto di interes general. Organisacionan cu a participa na e session aki tabata SIMAR, SPA, SADA y OPPA. Lider di Partido mr. Mike Eman a dirigi e brainstorming cu un panel di colega y conseheronan, parlamentario Robert Candelaria, dr.mr. Rycond Santo do Nascimento, mr. Franky Hoevertsz, drs. Rene Herde y Carl Giel. 

Lider di AVP, Mike Eman despues di e dialgo aki a mustra un biaha mas riba e importancia pa un gobierno hiba dialogo na tur momento cu instancianan den comunidad, pa intercambia riba pensamento y mira con ta e miho forma pa yega na solucionnan adecuado pa henter pueblo.

“Ta hopi importante pa den e proceso aki, cu partido ta canando pa recoge sentimentonan y preocupacionnan  y ideanan cu tin den comunidad pa c’un futuro gobernacion, cu nos por a sinta bastante ora scucha di sindicatonan SADA di douane, SPA  di polis, sindicato SIMAR di maestronan di scol y tambe OPPA representando pensionadonan. Den tur e presentacionnan cu nos a haya di nan, nos ta sinti claramente un preocupacion cu bo por categorisa den tres punto hopi importante cu a sali den e session aki padilanti.

Un preocupacion hopi hopi grandi ta cu no tin participacion real na e momentonan aki, no tin dialogo, caminda tin sindicato ta wardando mas c’un aña riba reunionnan, riba punto y temanan hopi importante pa nan, tin otronan cu a haya invitacion caminda e Minister ta simplemente participa nan riba kico ta su decision y otronan simplemente no ta haya reunion cu gobierno.

Tin un sentido hopi hopi grandi di falta di participacion riba temanan asina esencial, hustamente den un periodo cu mas cu nunca, Aruba mester tin un dialogo caminda hunto nos ta mira e retonan cu nos tin nos dilanti  y busca e solucionnan den un contexto cu tin ‘draagvlak’ p’e den comunidad.

Tur cos ta wordo imponi na e momentonan aki, ta sinti cu hopi cos a wordo presenta na ultimo ora caminda no tin espacio mas pa discusion.

Nos a haci un compromiso e anochi aki tambe na esunnan presente, c’un gobierno di signatura AVP, defintivamente y nos no ta bisa esaki sin referencia di un ‘trackrecord’ lo re-introduci e Plataforma di dialogo social caminda cu riba temanan grandi y esencial pa pais Aruba, tin dialogo cu gremionan te ora cu nos por yega na fiha hunto, kico nos ta mira como solucion, kico nos ta mira como e puntonan di bista cu nos tin cu encamina pa mehora desaroyo di nos pais.

Esaki ta un sentimento cu nos ta sinti den henter e epoca aki caminda cu ta biba un inkietud grandi cu gobierno ta ignora necesidadnan di dialogo.

Ta impone decisionnan y hopi bes tambe ta priminti di lo cambia decisionnan cu sindicatonan a bisa cu nan no ta haya corecto, entre otro caminda Prome Minister a priminti tambe cu e si lo cambia un decision di Minister di Enseñansa y despues nada ta wordo cambia y esaki ta puntonan cu a resalta den e session aki. Tambe e inkietud di perdida grandi di poder di compra,   hopi preocupacion riba kico ta e futuro di pais Aruba si sigui riba e caminda aki, caminda simplemente no tin un vision economico, cu con pa sali padilanti, pero ta busca esaki den saco di conciudadanonan y empleadonan.

E ta hopi obvio cu cu lo yega un momento cu e pobresa lo bira hopi pero hopi grandi den pais Aruba  y e falta di vision  di un claridad riba kico ta spera nos mayan y e falta di dialogo, ta tres cos cu a resalta den e session aki y pa nos tabata hopi importante di por a scucha di tur e gremionan, nan puntonan di bista, tambe riba puntonan mas specifico, si ta polis, si ta maestronan di scol, si ta douane of si ta nos pensionadonan, unda nan ta mira cu e sapato ta primi, kico ta nan pensamento di solucionnan, y pa hunto nos dilenea e ora ey a base di proceso aki cu partido AVP ta canando, di scucha, pensa, recupera miho, pa plan cu nos formula, lo ta un plan cu ta representa e deseonan cu ta biba den curazon y alma di nos hendenan.

Esey ta e compromiso cu nos a bin cune e anochi aki y mescos cu nos a haci den sessionnan anterior, nos ta hopi agradecido cu nos ta hayando un participacion asina amplio di e sectornan, nan ta habri nan curazon na un manera hopi sincero y pa nos esey ta hopi importante, pasobra nos ta haya e informacion cu nos mester pa Aruba por tin un gobierno nobo na final di aña 2021, cu realmente ta bay traha hunto cu tur sector den nos comunidad, riba pone Aruba riba un bon direccion atrobe,” lider di AVP Mike Eman a declara despues di e ‘brainstorming session.