Dialuna 18 di juni partido AVP lo inicia un serie di reunionnan informativo pa pueblo, caminda lo bay duna informacion riba e pakete di medida di gabinete Wever Croes cu lo drenta na vigor dentro di algun dia, lider di fraccion di AVP, Marlon Sneek a indica.

“Nos lo bay duna pueblo informacion cu pueblo tin mester ya cu ta importante pa pueblo sa cu desde prome di juli, riba carchi di celular, principalmente nos hobennan kendenan mester keda den contacto cu nan mayor pa bin busca nan despues di scol, nan lo bay paga 6% di BBO.

Nos mester informa cu seguro tambe ta bay subi cu 6%, tambe nos tin cu informa cu transaccionnan na banco ta bay subi cu 6%.

Sigur nos tin cu informa nos pensionadonan, pasobra e wega a wordo hunga cu desde 1 di juli bay ariba nada lo pasa, pero desde prome di januari 2019 esunnan cu tin un entrada riba e 1107 florin di AOV, lo bay perde nan reparatietoeslag.

Pa AVP ta importante como partido pa cumpli cu nos deber civico di informa nos comunidad riba e desaroyonan aki cu ta bay tuma luga entrante prome di juli riba nos isla.

Na mes momento ta bon pa nos corda nos pueblo tambe cu entrante prome di juli airporttax ta bay subi cu 40%, tur esaki simplemente pa gobierno por haya su dividend, pa gobierno por haya su 1.5 miyon florin cu el a manda pidi Triple A y aki nos ta mira cu pa gobierno di MEP, POR y RED, nan interesnan ta mas importante cu esnan di pueblo.

Caminda nan ta bisa cu e ser humano ta central, nos ta mira cu nada di ser humano ta central ya cu pan ta subi, seguro ta subi, transaccionnan na banco ta subi, un grupo grandi lo bay perde nan reparatietoeslag, kiermen e ser humano sigur no ta central cerca e gobierno aki.

Nan tin mester di placa y nan a bisa triple A cu nan mester di 1.5 miyon y no ta importa gobierno for di unda nan ta saca esaki y e ora ta pueblo tin cu bay paga pa esaki cu ta otro medida contra pueblo cu ta 40% riba airporttax.