Parlamentario Arthur Dowers di fraccion di AVP ta kere cu e momento a yega pa Minister di Husticia stop di hunga wega cu seguridad di nos pueblo y cuminsa cumpli cu tur loke el a priminti pueblo di haci, esta di elimina criminalidad y caba cu atraconan.
Segun sr Dowers, e chiste of e ultimo hazaña di e Minister di Husticia ta cu e kier investiga e ex Minister di Husticia, esta su persona.
“Tanto crimen cu tin den e pais aki, den aparato, den e sistema, tur sorto di crimen tin y e no ta investiga nan. E kier investiga ex Minister di Husticia. E kier gasta placa di pueblo y energia di trahadonan pa investiga mi persona. Sr. Bikker ora cu bo a pensa di haya tino con pa goberna, ami tabata gobernando caba y ainda mi ta realisa cu bo no a haya tino, pasobra bo ta haciendo basta cos cu no tin sentido,” Parlamentario Dowers a expresa.
E Parlamentario di AVP a sigui mustra cu e ta sinti cu e minister tin rabia riba e proyecto di rijbewijs y esaki ta un bon proyecto cu tambe tin cosnan cu mester wordo drecha den dje ainda. Esaki ta trabou di Andin Bikker pa sigui traha y mehora e proyecto.
Dowers a mustra cu e no ta compronde e rabia cu e mandatario tin riba e proyecto di rijbewijs cu ta algo cu pueblo a keda contento cun’e.
El a splica cu a bin cu e proyecto aki pasobra antes e hendenan mester a spera hopi luna pa por haya rijbewijs. Gobierno anterior a paga e debe cu tabatin y a haya un oferta local pa traha e rijbewijs y pa pueblo el a resulta hopi bon. Pero ta parce cu ora un cos ta bon pa pueblo nan kier kibr’e y purba difama su persona como ex Minister di Husticia.
“Ami no tin arte ni parte den bestelmento di ningun material pa rijbewijs.”
Dowers ta sumamente decepciona cu den esaki Minister Bikker ta haya apoyo di Rocco Tjon, kende tabata un alto funcionario policial cu a traha bou responsabilidad di ex Minister di Husticia y sa hopi bon con e asunto aki ta bay.
“Mi a traha cu Tjon cu masha respet p’e y tambe e tabatin respet pami. E respet ey ta keda te ora cu e crusa e linea. Bo sa masha bon con nos a traha y bo sa tambe como alto funcionario cu hopi opdracht ta wordo crea dor di boso ambtenaarnan, tanto den Polis como den KIA y ta wordo bestel dor di boso departamentonan. Despues nan ta bin cerca mi pa parafeer e ordo. Mi no ta descarta cu nan a ordo algo sin un MB. Esey ta posibel.
Mi ta hay’e ridiculo cu boso kier hinca mi nomber den algo cu mi no tin arte ni parte. Pasobra e Minister di Husticia ta di mala fe, e kier wak un forma pa atacha e bon nomber di e ex Minister di Husticia.”
El a enfatisa cu e sa si di loke Bikker ta papiando di dje y e ta warda un informacion pa e mes bay Landsrecherche. Esaki pasobra tabatin cierto funcionarionan cu nan hobby tabata pa boicotea e Gobierno anterior. E no tin nada di haber cu corupcion pero tin di haber cu ambtenaarnan. E ta un serie di rijbewijs cu a wordo bestel door di e Cuerpo Policial mes y no dor di Minister.
“Si ta guera bo kier bay, nos ta bay guera. Ami ta cana mi caminda pa Landsrecherche y nos ta topa den Corte. Mi ta warda sr. Bikker. Mi no tin miedo di ningun investigacion pasobra mi sa cu mi a traha segun mi consenshi y mi no a bay cu nada di Gobierno. Esey no ta mi forma di traha. Mi a sirbi pueblo cu honor y lo mi keda haci’e. No bin haci politica barata cumi.”
