E efecto grandi cu e Reforma Fiscal lo tin riba henter economia, comerciante y consumidornan, ta puntonan cu fraccion di AVP a trece dilanti durante tratamento di Presupuesto 2019 como tambe durante e tratamento di  e ley di Reforma Fiscal. Awe cu aña 2019 tin mas cu un siman aden, ta hustamente e preocupacionnan cu fraccion di AVP ta ricibi di consumidor y comerciantenan. E hecho cu ta prohibi pa e comerciante mustra e BBO riba e recibo ta muestra di e falta di transparencia y alabes ta mustra cu e impuesto aki tin un caracter permanente. “Awor no tin duda cu e impuesto lo no wordo kita y lo keda incorpora den e prijs di productonan.”

Durante tratamento di e ley di Reforma Fiscal, AVP tabata tin hopi pregunta cu no a wordo contesta. Esun principal tabata: Ken ta bay controla cu loke bo ta paga dia 31 di december ta e mescos cu loke cu bo ta paga dia 1 di januari 2019 ora cu tur e impuestonan a wordo incorpora den e prijs? Ken ta bay cubri gasto di e comerciantenan pa tur e gastonan cu nan a haci pa e cambionan pa cu nan menu of lista di productonan, of con ta bay controla cu stock bieu no tin mesun prijs di stock nobo cu mester paga mas accijns.

“Ta di lamenta cu consumidor ta wordo laga na merced di mercado y no tin proteccion p’e. Gobierno ta simplemente instrui e consumidor pa cumpra otro caminda si e no ta di acuerdo cu un prijs den un establecimento.” Segun Arends, esaki ta un falta di responsabilidad di parti di Gobierno.  “No por ta posibel cu Gobierno ta bini cu un medida cu no tin e claridad necesario, ta crea espacio pa incertidumbre y speculacion y laga e consumidor y comerciante bringa cu otro..”

Di otro banda a mira cu bebidanan alcoholico a conoce un aumento drastico di 40 pa 50% riba e prijs di benta por detal pa boter. Esaki no ta Richard Arends of Fraccion di AVP ta bisa, pero tur hende por bay wak e aumento drastico di prijs den e diferente establecimentonan. “Si maneho di Gobierno ta pa e consumidor local consumi menos, e ta logra esaki definitivamente pero e ta perde di bista ki efecto esaki den e siguiente schakel, ora e drenta e sector di horeca y turismo ta uza e productonan aki como parti di nan servicio”.

Siguramente e lo tin su efecto riba e prijs cu turistanan ta paga na Aruba y nan lo gasta menos den nos economia. E pregunta awor ta: con Gobierno lo compensa hotelnan cu a bende paketenan All Inclusive, of e hotelnan mes lo cubri e gasto adicional? Parlamentario Arends a menciona un carta cu a wordo manda door di Aruba Gastronomic Association, Camara di Comercio, AHATA y diferente otro organisacion den sector priva cu a pidi Gobierno pa no bini cu e cambionan aki. E carta a wordo poni un banda y a introduci di e prome fase di Reforma Fiscal na antoho di Gobierno.

“Si Gobierno su maneho ta pa demotiva hende pa bebe pa motibo di salud ta un cos, pero ora e ta afecta poder di compra y actividadnan economico di e pais, AVP tin problema cu esaki pasobra no tabatin estudio debido cu a wordo haci ni tampoco dialogo”. Si bo no ta wordo afecta directamente door di e Reforma Fiscal, bo ta wordo afecta indirectamente den bo poder di compra cu e sistema aki y ta e formula sigui frena e crecemento economico.

Ta surgi e mesun situacion cu 10 aña pasa ora cu a introduci BBO: un aumento descontrola di prijs combina cu poco crecemento economico a crea tasanan di inflacion hopi halto asotando poder di compra di nos tur.