Bao di un caluroso recepcion di un sala yen di pensionadonan presente na e Cas di OPPA diadomingo mainta Lider di Fraccion di AVP, mr. Mike Eman y colega parlamentario drs. Mervin Wyatt-Ras a entrega na OPPA un nota di fraccion di AVP. E nota aki ta importante pa pensionadonan, e ta boga pa un instituto scientifico cu entre otro ta bai documenta e preocupacion, nececidad y atencion pa nos grandinan. Den diez punto den e nota aki fraccion di AVP ta presenta e argumentonan pa e institucion di un Sociaal Cultureel Planbureau Aruba SCPA. E nota a worde ricibi dor di Presidente di OPPA, sr. Ivo Valdez. Eman a complimenta Sr. Valdez tambe pa su lucha pa a realisa un Cas pa miembronan di OPPA. 

E ocasion na cual Eman y Wyatt-Ras tabata presente pa presenta e nota di fraccion di AVP tabata un celebracion pa dia di nos grandinan na Cas di OPPA. Lider di AVP, mr. Mike Eman ta accentua e comprmiso di AVP pa lucha pa un aumento substancial di pensioen di nos grandinan.

SOCIAAL CULTUREEL 

PLANBUREAU ARUBA SCPA 

LO DOCUMENTA NECECIDAD DI GRANDINAN 

Mr. Mike Eman ta subraya cu ta imposibel pa pensionado cu ta biba di un entrada di pensioen so por tin un bida digno cu e costo di bida actual. Sea e pensioen di SVB mester worde aumenta considerablemente of gobierno tin cu aumenta e reparatietoeslag cu AVP a introduci pa cada pensionado considerablemente”, asina e lider di AVP, mr. Mike Eman a expresa despues di un analysis profundo di cifranan y papiando cu pensionadonan. E ta mustra cu un instituto manera Sociaal Cultureel Planbureau Aruba SPCA cu fraccion di AVP kier realisa hunto cu Hulanda lo documenta e nececidadnan y retonan di nos grandinan di un forma cu nan mester bai haya atencion. Esey ta locual e nota cu fraccion di AVP a traha cu yama “The Bigger Picture”, een Pleidooi voor de institutionalisering 

van een Sociaal Cultureel Planbureau Aruba SCPA, ta boga pe.

AVP KIER AUMENTO SUBSTANCIAL 

DI PENSIOEN PA NOS GRANDINAN

E lider di AVP, mr. Mike Eman ta conclui bisando cu e situacion aki ta creando un pobresa feroz y inacceptabel pa nos grandinan. E ta insisti cu e situacion doloroso aki mester conoce un cambio, un alivio mester bin urgente pa nos conciudadanonan di edad major. Eman ta bisa cu sea e placa di pensioen mester worde aumenta considerablemente of e reparatietoeslag cu gobierno di AVP a introduci mester worde aumenta substancialmente. Eman ta bisa cu no por otro, mester bin un aumento substancial di pensioen pa nos grandinan, sino nos pensionadonan lo keda biba bao di e linea di sobrebibencia cu e propio CBS ta calcula tur luna. Eman ta enfatisa cu na momento cu Aruba tin un Social Cultureel Planbureau e nececidadnan di nos grandinan ta bai keda mihor documenta cu no por nenga mas e pobresa bao di nos pensionadonan. Para hunto cu Ivo Valdez di OPPA y colega Mervin Wyatt Ras, e lider di AVP mr. Mike Eman a clausura bisando: “E rapportnan di un SCPA, manera fraccion di AVP ta boga pe, lo duna tur cu ta lucha pa nos grandinan mas forza den nan lucha”.