Diaranson anochi lider di fraccion di Partido di Pueblo Arubano AVP, mr. Mike Eman, den compania di colega parlamentario ing. Mike de Meza y candidato Wendrick Cicilia, a entrega un peticion na Parlamento di Aruba pa su president yama Minister di Transporte Ursell Arends cu urgencia pa presenta na un reunion publico di Parlamento.
Despues di a deposita e peticion den postbus di parlamento, Eman a comenta cu si tabatin boluntad suficiente di parti di coalicion, Presidente di Parlamento, mr. Edgard Vrolijk diaranson anochi mes por a bin oficina pa procesa e peticion y haci e yamada oficial.
Eman ta splica cu despues di indicacionnan den transcurso di diaranson atardi cu e frustracion di taxista pa e posicion terco di minister a escala a haya necesario pa entrega e peticion aki anochi mes.
Aunke tin programa pa diahuebs mainta un reunion di comision central di transporte, como cu no ta conta cu participacion di Minister Arends, no ta spera ningun accion concreto lo sali di esaki, mientras cu e disgusto entre taxista si ta sigui aumenta.
E lider di AVP tambe a menciona cu mescos awe tabatin un crisis den gobierno di Corsou, na Aruba tambe ta bibando momentonan di tension den coalicion MEP-RAIZ. No ta trata solamente pa e situacion cu taxista, pero mas bien algo cu a bin ta desaroya gradualmente cu cada diferencia di opinion cu a surgi entre e dos partido di gobierno.
Di su banda, Parlamentario de Meza a mustra cu solamente den e ministerio di Arends, cu ta regarda medio ambiente, asunto di adulto mayor y transporte, tin masha hopi otro problema hopi mas grandi y urgente pa atende cu e maneho di taxista. E ta considera cu Arends su atencion lo ta mas util pa soluciona e problema di remedi pa nos grandinan y of sushi rond di e isla. De Meza ta keda sospecha di kico ta e interes real di e mandatario tras di tur esaki.
Di nan banda, e partner den coalicion, esta partido MEP despues di a aproba e mocion cu a duna Arends e oportunidad pa tuma accion afectando taxista, awor tanto minister como parlamentario di e partido geel ta haya nan mes ta purba haci ‘damage control.’
Den nan carta fraccion di AVP ta envatisa e derechonan di taxistanan cu Gabinete Wever-Croes awor kier corta. E carta ta bisa specificamente riba e punto aki: “De unilaterale aantasting van de rechten van de Taxi vergunninghouders is geheel in strijd met het jarenlang gevoerde beleid, waarmee de rechtszekerheid en continuïteit van de taxivergunninghouders werd erkend, evenals de financiële zekerheid voor hun gezin. Pesey e lider di fraccion mr. Mike Eman a accentua cu ta urgente pa e reunion aki worde yama pa para Minister den e violación di e derechonan histórico aki di taxistanan.
