Den e rapport cu Partido AVP a traha riba maneho di Covid-19 e partido ta conseha tambe pa tin mas atencion social pa famianan cu a worde afecta pa Covid. Despues di un serie di reunionan cu e partido a sostene pa dialoga riba e recomendacionan den e rapport “Covid-19 den Perspectiva” e Lider di AVP, mr. Mike Eman y parlamentario drs. Mervin Wyatt Ras a comparti cu comunidad e diferente sugerencianan pa mehoracion den e maneho di Covid-19 cu tin den e rapport.

E lider di AVP, mr. Mike Eman a splica cu banda di e trato medico y contacto cu famianan pa keda monitoria y controla pa minimalisa mas contagio ta importante tambe pa famianan, sigur esnan den mas nececidad, haya tambe asistencia social pa supera e dianan y simanan dificil pa e patient y henter famia cu practicamente ta keda isola y hopi dependiente di ajudo y asistencia.

Eman ta mustra cu e situacion socio-economico ya sin cu e malesa bati na porta di un famia na Aruba ta hopi dificil. Miles a perde trabao. Otronan tin unicamente 60% di nan salario of hasta menos. Famianan bibando cu unicamente entradanan margina ta pasa un momento ainda mas dificil ora cu un miembro di famia of mas haya Covid of worde poni mes den quarentena pa motibo di contacto cu otronan. E ta crea un situacion hopi dificil riba un situacion cu ya caba tabata hopi doloroso pa miles di famia na Aruba.     

Pesey e lider di AVP, mr. Mike Eman ta splica cu den e rapport “Maneho Covid-19 den Perspectiva” a inclui tambe un recomendacion pa asistencia social pa e famianan aki. E rapport ta bisa: 

Introduci asistencia socal pa patientnan y famia durante nan contagio

• Hopi patient cu a test positivo y cu sintomanan pisa ta pasa momentonan hopi dificil den isolacion. Esaki ta conta tambe pa nan famia. Banda di e rol di gobierno den “contact and tracing”, mester añadi un elemento di apoyo y sosten social pa e patientnan y famia.  Hopi famia y amistad comunitario a yuda patientnan den e proceso aki. Esaki tambe mester keda reconoci y stimula. 

Tanto e lider di AVP, mr. Mike Eman y parlamentario drs. Mervin Wyatt Ras a bisa cu nan ta spera cu gobierno lo sigui e recomendacionan den e rapport, pasobra nan ta producto di locual a recohe na pensamentonan profundo di expertonan den nos comunidad y tambe di experiencia di hopi famia cu a biba e reto di surpasa e tempo dificil cu un of mas miembro di famia cu Covid.