Lider di fraccion di AVP, sr Marlon Sneek durante conferencia di prensa di AVP  a repasa algun punto di e ley di sreening cu no a haya sosten pa e wordo pasa den Parlamento.

No solamente e ley aki no a haya mayoria ya cu e no a conta cu sosten di e miembro di RED cu ta sostene gobierno pero for di dos siman pasa cu a trata esaki, no a tende nada mas di e iniciadonan di e ley di screening.

“Por mira cu fraccion di MEP ta buracho di poder ya cu ta mas cu dos siman caba a trata e ley aki den Parlamento y te cu awe fraccion di AVP no a haya un acercamento di fraccion di MEP, pa bay delibera riba puntonan cu nos tabatin den nos amienda.

Puntonan cu nos ta haya ta importante pa bin den e ley pa asina tin  un screening di berdad y pa fraccion di AVP ta importante pa ministernan cu ta sinta awe, tambe wordo someti na e ley di screening nobo aki y nan tambe wordo gescreen.

Esaki pa motibo cu  no Marlon Sneek, pero Ricardo Croes di RED cu ta sostene gobierno, a para dilanti di Parlamento den un declaracion na prensa y bisa cu tin mas c’un minister di e actual gobeirno bou di investigacion.

Den e ley nobo presenta si un persona ta bou di investigacion, e no por carga responsabilidad como minister, pues ta imposibel cu a bay screen otro hendenan, anto bo ministernan mes bo no kier screen.

Den Parlamento recientemente Minister Marisol Lopez Tromp a informa Parlamento cu el a entrega kehonan di actonan contra ley cu ta yega cerca Ministernan, cu otro palabra pues tin suficiente hende den e gobierno aki, cu ta bisa cu tin investigacionnan andando contra gobernantenan.

Kiermen nan tin cu wordo gescreen y ta inaceptabel cu awe bo kier papia di abo ta mas santo cu Papa di Roma, bo kier midi tur otro hende pero bo mes bo no kier screen.

Pa fraccion di AVP esaki ta di lamenta ya cu esaki ta e gobierno cu ta papia di transparencia,  cu ta papia di nos Hoge College van Staten, pero te dia di awe, ARA tin un Presidente suplente  ya cu no tin madures suficiente pa logra dos tercera parti den parlamento pa logra nombra un Presidente.

No tin madures di parti di fraccion di MEP pa sinta na mes y discuti y mira ken ta e persona cu lo bay bira presidente di ARA, esaki ta e gobierno cu nos tin.

Algun dia pasa Parlamento a caba di pasa e ley di ‘onbudsman’  y  mi ta spera cu pronto nos por haya un combersacion sea cu Prome Minister of sea cu e fraccion di MEP pa wak cual ta e nombernan cu nan tin pensa pa bay buta como onbudsman, esun suplente y esunnan cu emseter tin den e departamento aki.

Nos no ta spera cu e nombernan lo sali cay for di shelo ya cu pa esey tambe tin mester di sosten di dos tercera parti di Parlamento pa por logra nombra e onbudsman aki.

Ta di spera cu gobierno aki cu ta burachi pa poder, no djis manda nomber pa parlamento, djis bisa cu esaki ta e nombernan cu tin pero tin cu sinta na mesa manera politiconan  madura y percura cu pa di berdad nos haya e miho  hende na e miho luga.

Pasobra un gobierno burachi di poder, ta djis coy algun nomber manda pa parlamento anto ta spera cu tur hende mester grita ‘voor.’

Shonnan, nos mester ta serio, nos mester sinta na mesa pa hunto nos mir ken ta e miho candidato pa bay cubri entre otro e posicion aki ya cu no mester lubida, cu tin mester di dos tercera parti di Parlamento pa nombra e persona pa e puesto aki.

Sigur lo bay ta di lamenta cu ta manda un nomber di un hende cu no ta carga aprobacion di Parlamento pa esaki, caminda su nomber ta bay den publicidad cu e no a gosa di sosten pa e nombracion, caminda  pa e persona aki y su carera esaki lo bira un situacion bergonsoso.

Fraccion di AVP ta spera cu gobierno mustra madures di su parti y pa nos tende di gobierno pa loke ta e posicion aki di onbudsman y otro cambionan cu mester bin.

Tin otro cambionan manera ley di Raad van Advies, ley di ARA, mester traha ley pa parlamento bira independiente y eynan tambe ora cu ta bay cambio constitucion, tin mester di sosten di dos tercera parti.

Ban ta politiconan madura  pa despues no mester scucha cu parlamentarionan di AVP no  kier coopera, cu fraccion di AVP ta contra di A, cu ta contra di B, pero absolutamente no ta corecto, pero ban tuma ehempel di otro paisnan caminda rivalnan politico ta sinta hunto na mes pa atende asunto di interes general cu tur respet cu por tin.

Aki na Aruba no ta diferente, cu tin  momento cu mester sinta hunto pa atende asuntonan importante, sigur ora cu AVP cu ta e partidi di mas grandi di Aruba cu nuebe asiento den ultimo eleccion, mester respeta su opinion y sinta cune na mesa pa yega na miho leynan y yega na miho decisionnan pa e pais aki.

Fraccion di AVP ta spera cu pronto nos lo tende di esaki, esta di un aceramento di gobierno y di fraccion di MEP cu ta sostene gobierno pa asina yega na palabracion concreto cu taregarda asuntonan di importancia,” lider di fraccion di AVP, Marlon Sneek a trece dilanti.